Spurs-ah Kane a nghet

Harry Kane chuan kum 2022 thleng Tot-tenham tana khel chhun-zawm turin contract thar a ziak. Kane hlawh zat hi tarlan chiah ni lo mah se karkhata £80,000 hlawh captain Hugo Lloris khumin Spurs tana hlawh hnem ber a ni ang.

Kum 23-a upa Kane hi North London club tan hian kum 2009 aṭang khan a inlan ṭan a, 2014-15 season khan Premier League-ah goal 21 khungin season liam ta khan goal 25 khung leh bawkin Golden Boot a dawng.

England international hi kuminah a kerek na vangin match 10 chhung ngawt a khel thei lo a, match 10 a khelh tawh aṭangin goal ruk a khung leh der tawh.

Ram tan match 17 a khelh aṭanga goal nga khung thei striker chuan, "Engtiang takin nge he club hi ka ngainata ka hmangaih chu mi hriat a ni. Kan team-ah hian player naupang ṭha rual an tam avangin hmasawn zel turin kawngdik kan zawh mek," tiin a sawi.

Tottenham manager Mauricio Pochettino chuan an player ṭha leh beisei awm berte zinga miin club tana a rinawm zia lantir nana contract a pawtsei chu a lawmawm a tih thu a sawi ve bawk. Premier League season kal meka goal chhuah tlem ber Spurs (10) hian zanin dar 8:30-ah Swansea City an lo mikhual ang.