Chapecoense player-te sùnna hmang dawn

Football khawvela thunei­tu sang ber FIFA chuan thlawh­theihna chetsual vanga thi ta Brazilian club Chapecoense player 19-te sunna hun khawvel hmun hrang hranga hmang turin thuchhuah a siam.

FIFA chuan Chapecoense player-te hriatreng nan hian khawvel hmun hrang hranga club te chu kartawp league match-ah ngawi renga minute khat hun hmang turin a ti a, football club-te chu an banah ribbbon dum hreng turin a ngen bawk.

Karleh Champions League leh Europa League-ah Chapecoense player-te sunna hun hi hman a ni dawn a, EFL Cup quarterfinal-ah khan hman a lo ni tawh bawk.

Player dinhmun

Mi 71 zetin nunna an chan phahna thlawhtheihna che­sualah khan Chapecoense player zingah defender Alan Luciano Ruschel, reserve goal­keeper Jackson Ragnar Follmann leh centre-back Helio Hermito Zampier Neto te chu mi paruk dam chhuak zinga mi an ni.

Ruschel leh Neto te hi an hliam serious viau mah se ṭhat lam an pan zel a, goalkeeper Follmann chuan a ke pakhat a hloh hnuah a ke lehlam pawh hloh thei dinhmunah a ding mek.

A tui tlem vang

Colombia thuneitute chuan thlawhtheihna chetsual chhan khan Medellin ṭum hmuna
ṭum tura thlawhna tui a tam tawk loh vang a nih thu an sawi. Colombia civil aviation chief Alfredo Bocanegra chuan, "Uluk taka kan zirchian hnuah thlawhtheihna khan tluang tak a ṭum hmun thlenna khawp tui a nei lo a ni," a ti.

Aviation official zinga mi Freddy Bonilla chuan thlawhtheihna reng rengin an thlawh chhuah dawnin minute 30 chhung tal thlawhna tur reserve fuel an nei tur a ni, a ti a, Chapecoense player-te chuan thlawhna tui reserve an neih miah loh thu a sawi bawk.

Bonilla chuan, "Engine hi electric tan a pawimawh a, thlawhna tui ber a awm miau loh chuan electronic lam buaina chu a thleng nghal mai dawn a ni," a ti.

Kan tho leh ang

Chapecoense director Cecilio Hans chuan, "Tunah hian engmah loah awm mah ila, kan player nunna chan ta te hriatreng nan tun hma zawng aia chak leh ṭha zawkin kan ding leh ang," a ti.

An player tam zawk chantu Chapecoense hian tun season Serie A match hnuhnung berah Atletico Mineiro an la mikhual dawn a, club acting president Ivan Tozzo chuan reserve team leh academy player te chhawr chungin he match hi an khelh tur thu sawi mah se Mineiro president Daniel Nepomuceno chuan team an tirh loh tur thu leh Chapecoense chu chak zawka puan nise an duh thu an sawi.

Mangṭha tih a har

Chapecoense chetsualnaah Alejandro Martinuccio, Nenem, Demerson, Marcelo Boeck, Andrei, Hyoran, Nivaldo, Moises leh Rafael Lima te an zin chhuak ve lo a, an chhiat tawhna rapthlak avangin veteran keeper Nivaldo chuan inkhelh a chawlhsan thu a puang nghal.

Mahse, kum 42-a upa keeper chuan, "Ka ṭhiante khan kan match hnuhnung ber hi khel turin min duh ang tih ka ring a, vawi khat tal chu inkhelh leh ka duh a ni. Stadium khat veka ka ṭhian thi ta te hming lama fans au rual chu engtin nge ka hmachhawn ang? tih ka ngaihtuah a, a harsa dawn a ni," a ti.

A birthday lawm vanga zin ve lo reserve goalkeeper Marcelo Boeck chuan kum thara chhuak thei dinhmunah a ṭhiante nen ding mah se chhuah tumna an neih loh thu a sawi a, "Tun hi hun danglam bik a ni a, kan ṭhiante hriatreng nana he team dinthar leh hi kan duh a ni," tiin a sawi.

Puih inhnuam Ronaldinho

Khawthlang media te chuan Brazilian footballer ropui chawl ta Ronaldinho leh kum 2014-a chawl tawh Argentine player ropui Juan Roman Riquelme te chuan Chapecoense pui turin chhiat tawk club tan hian a thlawna inkhelh an huam thu an tarlang.