El Clasico Barcelona an inpeih meuh em?
Zanin dar 8:45-ah Barcelona-in Real Madrid an mikhual dawn a, khawvel ngaihven El Clasico hmachhawn turin Barcelona an inpeih meuh em? tih hi zawhna awm nghal chu a ni.
Luis Enrique-a naute hian an league match hnuhnung berah Real So-ciedad chu goal khat ve ve khungin an inhnehtawkpui a, Copa del Rey lamah second division club Hercules chu 1-1 thoin an inhnehtawkpui bawk.
La Liga-ah Madrid-in hmahruaitu dinhmun an luah mek a, an hnuai chiaha awm Barca-in an phak lohna chu point ruk a ni. Match hnih chhung chak hmel hmu tawh lo Catalan club tan tun hi insiamṭhat hun a ni a, an hmelma Real nena an inkar tih zimna remchang a ni tel nghal bawk.
Barca an buai?
Real-in inelna hrang hrangah match 32 chhung a zawna tlawm hmel an hmuh loh avangin inrintawkna nasa tak an nei ang tih a chiang a, Zinedine Zidane-a naute tan tun aia Barca lenchilhna hun ṭha a awm chuang lo.
Sociedad nena an inhnehtawk hnu lawkah Enrique-a'n, "Barcelona coach ka nih hnuah hetiang taka kan khingpui kan ngam loh hi ka la hmu lo," tiin a sawi a, Barca an buai tih zep rual a ni lo - Real an phur khawp ang.
Sulhnu
La Liga bikah team pahnih hi vawi 172 an inhmachhawn tawh a, Real an chungnung zawk - Madrid khaw club hian vawi 72 hnehna changin vawi 32 an inhnehtawk a, Barcelona-in vawi 68 hnehna an chang thung.
Inelna hrang hrangah erawh Barca an chungnung zawk. Vawi 264 an inhmachhawn tawhah Barca hian vawi 109 hnehna changin vawi 58 an inhnehtawk a, Real-in vawi 97 hnehna an chang thung.
Messi vs Ronaldo
Tun season kal meka team pahnih player-te khaikhinin Lionel Messi a chungnung ber. Argentina captain hian inelna hrang hrangah match 16 khelin goal 19 zet a khung tawh a, a hnuai chiaha awm Ronaldo chuan match 15-ah goal 12 a khung tawh thung. Luis Suarez-a'n match 18-ah goal 11 khungin pathumna a ni a, Uruguayan striker hnuai chiahah hian vawi 17 inlana goal riat khungtu Alvaro Morata a awm.
Minute khelh zat aṭanga chhutin Messi chu minute 68 dan zela goal khung ang a ni a, a hnuai chiaha awm Morata chuan Ronaldo khumin minute 103 dana goal khung ang a ni a, Portugal captain hi minute 108 dana goal khung ang a ni thung. Palina Suarez chu minute 132 dana goal khung ang a ni.
Neymar-a'n inelna hrang hrangah goal ruk chiah la khung mah se a ṭhiante tan assist 12 a nei tawh a, Messi-a'n vawi sarih assist neiin Ronaldo-a'n assist paruk a nei thung - tun season a an chet tawh dan aṭangin Ronaldo aiin Messi a ropui a, zaninah chungnung zawk nih an inchuh leh ang.
Team Dinhmun
Season tir aṭang tawha hliam vanga buai ṭhin Andres Iniesta a dam tawh a, Spanish midfielder hian inkhel bul a ṭan loh pawh in substitute bench aṭang tala tlan lut tura beisei a ni. Sociedad laka inhliam Gerard Pique dinhmun a chiang lo a, Jordi Alba, Samuel Umtiti leh Jeremy Mathieu te chu an inhliam vek bawk.
Zinedine Zidane-a'n Gareth Bale, Toni Kroos leh Raphael Varane te hliam vangin a chhawr thei dawn lo chiang a, Casemiro-a hliam dam leh ṭan tawh mah se first eleven chang nghal tur erawhin a beiseiawm loh.