Arsenal an chak ve ta

Goal phur hmasa leh mah se Arsenal chuan chak nei loa match kua an kal hnuah hnehna an chang ve ta. Thawhṭanni zan Premier League inkhelah Gunners hian West Ham chu 3-1 in an luhchhuah.

Manager lailawk Freddie Ljungberg-a'n a naute match thum a kaihhruai china chak ni hmel a hmuh vawi khatna a ni. North London club hian Ningani zanah Europa League khel turin Standard Liege an tlawh dawn a, Pathianni zanah Manchester City an mikhual zui dawn avangin an hmabak a hautak.

West Ham hmachhawn turin Ljungberg chuan a naute a siksawi nasa. Rawlthar Martinelli chu a vawi khat nan Premier League-ah inkhel bul a ṭantir a, tlarhmaah Aubameyang leh Pepe te nena inkawpin an hnungah Mesut Ozil a awm thung.

Tlarhnungah Kieran Tierney, Calum Chambers leh Hector Bellerin te hmel hmuh tura ruahman a ni. Mahse, warm-up neih laiin Bellerin a inhliam a, a aiah Ainsley Maitland-Niles a rawn ding - Tierney pawh chawlhlawk hmain lakchhuah a ngai a, tharum ngah Sead Kolasinac chuan a rawn thlak.

Captain nihna hlihsak Granit Xhaka leh Lucas Torreira te midfield laiah an inkawp a, Swiss midfielder hi hun tawp dawn hnaiah hliam vanga thlak a ngai. Defender tawnhriat ngah David Luiz leh striker Alexandre Lacazette te chuan bench lamah hun an hmang thung.

London Stadium-a inkhelah West Ham tan Angelo Ogbonna chuan minute 38-naah goal hmahruai a tauh lut, a goal khung danah hand ball niin a lan avangin VAR hman a ni - mahse goal luh danah dah bawhchhiat a neih loh avangin pawmsak a ni.

Team talbuai Arsenal an buai chhunzawm leh mai a rinawm hman. Mahse, second half minute kua chhung lekin boruak a inthlak danglam vek. Kolasinac-a cross ball chu vengtu nei lo Martinelli (60') chuan si phurh sut nan a khung.

Gunners player manto ber Pepe-a'n (66') Aubameyang hnen aṭanga a ball hmuh chu box sir lam aṭangin an hmahruai nan a thlawh lut a, Ivory Coast international forward hian a goal khung tur siamsaktu Auba goal (69') tur a siamsak let ve leh bawk. Goal thum khung turin minute kua bak an mamawh lo.

Arsenal manager lailawk Ljungberg chuan, "Player-ten inrintawkna an neih loha an tlan tam loh bawk chuan chak theih a ni lo. Second half-ah erawh ka naute an tlan tamin an theihtawp an chhuah tak meuh, khatiang hmuh kha chu a nuam a ni.

"Player khel tur thlan chungchangah thutlukna hautak zet ka siam. Alexandre Lacazette hi player ṭha bik a ni a, chutih rualin Martinelli kha hah thei lo ang maia tlan kual reng peih a ni thung," tiin tlarhhma lam a siaksawi dan a sawi tel.

West Ham manager Manuel Pellegrini chuan, "Minute 60 chhung kha chu kan chan a ni, mahse football-ah chuan hetiang thil hi a thleng thei. Tlarhnunga tihsual zauh kan nei kha a pawi ta ber a, kan result avang hian ka dinhmun a danglam phah lem lo," a ti.

Hammers hian point 16 chauh an la neih avangin tlak hlauhthawn awm zingah an awm mek, Inrinni zan hian an hnuaia awm Southampton an lenchilh leh ang. Arsenal erawh tlema hma sawn ve deuhin pakuana dinhmun an luah 

ve thung.