Club lian kan el ve thei - Payet

Dimitri Payet chuan club lian dangte el ve phak turin West Ham an ṭhat tawk thu a sawi. France international thusawi hi fiahin a awm nghal dawn - zanin dar 11:00-ah Hammers hian Arsenal an lo mikhual ang.

Kum 29-a upa Payet chuan, "Old Trafford-ah point kan hlawh chhuak thei a, a tawpah phei chuan point thum hmu zawk thei dinhmunah kan ding teuh
ṭhin hle. Ka ngaihdan chuan club lian hneh tur hian kan
ṭha ve tawk," tiin a sawi.

West Ham hian match 13 khelh tawh aṭangin point 12 chiah an la hmu a, league table-ah 16-na niin relegation zone-a awm Hull City nen an inthlauhna chu point khat chiah a ni - point an mamawh takzet.

Hammers hna hi a awlsam ngawt dawn lo, Arsene Wenger-a naute hi Southampton hneh lo hlim an nih avangin chak loh nawn an duh lo ang.

Gunners hian chanchin lawmawm loh an nei, midfielder Santi Cazorla chu karleh hian Sweden-ah a ke rek dinglam zai a ni dawn a, thla thum chhung tal a chawlh a ngai dawn.