Chanmari FC-in I League club an sawisa

Zirtawpni zanah Mizoram Premier League champion lai Aizawl FC an mualpho a, I League club hi Chanmari FC-in 4-1 in an sawp.

Chanmari FC tan Vanlalbiaa Chhangte, Lalruatfela Zote leh Lalrinchhana ten goal khat ṭheuh an khung a, Aizawl FC captain Rohmingthanga'n an lamah a tilut bawk. I League club mualpho hliah khuh nan Lalawmpuia Hnamte-in goal khat a khung ve bawk.

December 9, Zirtawpni zanah semifinal second leg khelh a ni dawn a, Aizawl FC-in red card hmuh vanga Ricky Lallawmawma an chhawr theih dawn loh vangin Chanmari FC hi final an luh ngei a rinawm tawh. Chanmari keeper Lalmuanawma'n Aizawl FC forward William Lalnunfela a titlu chunga hnawhchhuah a ni lo chu a vannei a, referee thutluknaah I League club an lawm lo ang.

Team thar

An intawn hnuhnung ber aṭangin Chanmari FC-in player pali an thlak a, Aizawl FC-in player pathum an thlak ve bawk.

Chanmari boss Lalsangzuala Hmar-in an inkhelh hmasaka goal hnih an chhuah avangin defence pali ṭhawt a thlak a, Nigerian defender Ugochukwu Godswill chiahin a hna ngai a chelh. Midfield-ah Chanmari Veng tlangval Rochhingpuia aiah Lalruatfela dahluh a ni bawk.

Aizawl FC coach Malsawmkima'n rawl-thar defender Hmingthanmawia leh Jonathan Lalhriatkima te chungah rinna a nghat chhunzawm a, midfield-ah B. Zoramthara aiah kumin MFA Super Cup best midfielder Rohmingthanga a luhtir a, forward F. Lal-remsanga aiah midfielder Lalawmpuia Hnamte a dah lut bawk.

Chanmari FC-in 4-3-3 aṭangin an formation chu 4-4-2 ah an thlak a, Aizawl FC-in 4-4-2 formation aṭangin 4-3-3 ah an thlak thung.

A goal mawlh mawlh

Chanmari FC midfielder R. Malsawm-tluanga corner pet chu Rinchhana'n a tauh pial hnuah Mabiaa'n a tauh goal. Aizawl FC-in William Lalnunfela hmangin an nawr let nghal a, Kolasib tlangval
cross chu Brandon VL Remdika'n goal-ah tauh mah se goalline aṭangin Rosanga'n a tauh chhuak.

I League club tlarhnung a pawp a, Mabiaa vawrh luh chu Fela Zote-in minute 11-na lekah chiang takin a pet lut. Aizawl FC-in chhanletna hun a nei a, Rohminga pass Bright Mends-a'n a tih goal loh hnuah a, Lalnuntluanga corner pet chu Opitea'n a tauh lut.

Mala hote insiamrem hmain Chanmari FC-in an chhanglet leh a, Hriang-tlang tlangval Mabiaa'n keeper T. Mawia a pet khum hnuah veteran midfielder Rohminga'n an lamah a tauh lut. AFC-in darkar chanve ral hmain right back Lal-lawmzuala aiah Lalrinzuala Khiangte an dah lut a, I League club tlarhnung erawh Chanmari forward Malsawmfela leh Dodoz ten an la sawi nghing nasa hle.

Second half-ah Chanmari bawkin goal an khung hmasa a, midfielder Lalrinchhana'n minute 49-naah yard 25 vel aṭangin a ke vei lamin a volley goal - Chanmari supporter phur tawh sa an phur belh nasa hle. Aizawl FC mangchhia a kiang thei lo a, minute 56-naah Thara'n a penalty hlawhchhuah chu goal-ah a chantir thei lo a, Chanmari keeper Lalmuanawma'n hming ṭhat nan a hmang.

Chanmari midfielder Mabiaa'n crossbar a pet per a, Fela Zote goal khung offside vanga pawm a ni lo. I League club-in second half-ah goal khung lo mah se minute 78-naa left back Ricky-a hnawhchhuah a nichunga goal tam zawk a chhuah loh avangin lawm tur an ni.

Shabaash Chanmari

K. Kawla Stand-a Chanmari ṭantu
ṭhahnem tak an zai rual ṭhup ṭhup a, tun season-ah nizan ang renga Chanmari mipuiin Lammuala zai ṭhat an nei lo.

Chanmarians an lawm tih nemnghettu chu an hla thul khung an phawrh chhuak a, 'Chanmari Veng kan ni e, entawn tlak kan awm lo," tiin an zai rual a. An hla thuah entawn tlak awm lo angin lang mah se an player-te an auh phur danah erawh entawn tur an hnutchhiah hnem hle.

Tute nge inlan?

Chanmari FC (4-4-2) : F. Lalmuanawma; C. Lalrosanga, Ugochukwu Godswill, Lalrinchhana Tochhawng, Thomas Lalengkima; Vanlalbiaa Chhangte, R. Malsawmtluanga, Lalrinchhana, Lalruatfela Zote (Rosangliana 90+2'); Leonce Dodoz (Lalrammawia 69'), Malsawmfela (Lalmuanzova 80').

Aizawl FC (4-3-3) : Zothanmawia; Lallawmzuala (Lalrinzuala Khiangte 27'), Jonathan Lalhriatkima, Hmingthanmawia, Ricky Lallawmawma (Red Card -78'); Lalnuntluanga (B. Zoramthara 39'), Rohmingthanga (F. Lalremsanga 72'), Lalawmpuia Hnamte; William Lalnunfela, Bright Middleton Mends, Brandon VL Remdika