Sindhu a inringtawk

Badminton thiam zual pariat inelna BWF Tour Finals chu vawiin aṭang hian Gaungzhou, China-ah khelh ṭan a ni dawn, champion lai PV Sindhu chuan inelna hmachhawn tura a inpeih thu a sawi.

Indian player zingah Sindhu chauh hi inlan phak a ni, vawiin hian a group match hmasa ber atan seeded pathumna Akane Yamaguchi nen an inkhel ang. Chen Yufei leh He Bingjiao te nen group A-ah an awmkhawm - an inkhel kual hnuah a sang pahnihin semifinal an lut ang.

Rio Olympic silver medalist Sindhu chuan, "Player tin mai hi an khel ṭha thei em em a, champion thei tur pawh an tam, ka hmuh dan chuan player pariat inlan zinga paruk hi chu champion thei an ni," a ti.India nula hian nomawi chawi thei tur langsar zingah - Nozomi Okuhara, Tai Tzu-ying leh Chen Yufei te chu hmachhawn hautak bik tur nia a ngaih thu a sawi bawk. Player tupawh mai hi awlsam taka hneh theih an nih a rinawm loh.

Group match hmasa bera a hmachhawn tur Yamaguchi hi tun hmain vawi 10 ngawt a hneh tawh a, inrintawkna a nei sang ang. Mahse, Japanese nula hian vawi ruk hnehna a chan tawh zingah an intawn hnuhnung pahnihah a chak - Sindhu hi a hlau bik lo ang.

Nikum khan Sindhu hian season ṭha taka hmangin BWF Tour Finals-ah a champion. Amaherawhchu kuminah a khel ṭha tawk lo, chutichung chuan world champion a ni thei tho a, player dang tana huphurhawm tak zinga mi a ni dawn.