Kar 10 chawl tur Patrick Dorgu

Manchester United winger Patrick Dorgu chu Arsenal nen an inkhelh ṭuma a malpui a tih hliam vangin kar 10 chhung a chawl dawn. Michael Carrick-a'n manager hna a chelh hnuah Dorgu a che ṭha a, Manchester City leh Arsenal lakah goal a khung ve ve avangin Man United tan channa lian tak a ni.

Red Devils hian match hnuhnung pahnihah Gunners leh City te an hneh avangin Premier League match 23 aṭangin point 38 an hmu a, palinaah an awm mek. Gunners 3-2 a an hneh ṭum hian minute 50-naah Dorgu hian goal mawi bik a khung a, hliam vangin minute 81-naah Benjamin Sesko-a'n a thlak.

Denmark international Dorgu dinhmun hi la enchian leh tur a nih avangin a chawlh hun tur hi a la chiang lo a, chutihrualin kar 10 tal chawl tura ngaih a ni.

Tu nge Dorgu?

Nikum February thla tir khan Man United-in Serie A club Lecce aṭangin Dorgu hi pound maktaduai 25-in an lalut a, Old Trafford a pan hma hian Italian club Lecce tan match 57 a khel hman.

Kum 21 mi Dorgu hi left back atana lakluh a ni a, season liam ta khan Man United tan match 12 a khel hman. Ruben Amorim-a hnuaiah pawh inlan tam tho mah se Portuguese manager hian ke vei lama pet a nichungin ding lamah a chawr a, a chhuah dawnah a sawisel bawk.

Amorim hian Dorgu hi ball a chanin a hlauthawng thei lutuk a, tihsual a ngah tiin media hmaah a player a sawisel. Portuguese manager hian Dorgu hi a ṭhatna takin a chhawr lo a, Man United ti ṭha thei tura ngaih a ni lo.

Harhtharna chang Dorgu

Amorim-a'n right wing back-ah Dorgu a chhawr a, Michael Carrick-a'n left wing-ah Dorgu hi a rawn chhawr ta thung. Danish international hi a tlan chak avangin khelmualah a ṭangkai a, defender-a bul ṭan a nih avangin tlarhmaa an dah pawhin tlarhnung a pui ṭha hle.

Arsenal an hneh ṭumah pawh goal ropui a khung ringawt lo a, Dorgu hian midfield-ah Kobbie Mainoo leh Casemiro te pui telin midfield tihphui kawngah a ṭangkai. Match pawimawh bikah a rawn chet ṭhat avangin Dorgu hi vawi leh khatah United player pawimawh zinga chhiar tel a ni nghal.

A thlakna tur?

Kar 10 chhung a chawlh dawn avangin Carrick-a'n Dorgu tel loa khelh dan a ruahman a ngai a, Man United manager lailawk tan ngaihtuah tur a tam phah sawt dawn. English manager hian mual sirah player tlan chak a chhawr ṭhin a, Amad Diallo leh Dorgu a thlang nghal chat pawh hi thilmak a ni lo.

Carrick-a'n City leh Arsenal an hneh ṭumin starting eleven ngai a hmang a, Fulham an hmachhawn hunah erawh a thlak ngei a ṭul dawn. Match hnih an khelh dan aṭanga thlir chuan Matheus Cunha tan hun ṭha a inher chhuak turah a ngaih theih.

Cunha hian Carrick hnuaiah bul a la ṭan lo a, bench aṭanga rawn lutin a khel ṭha ṭhin hle. Brazilian forward hian Arsenal lakah goal ropui leh chakna goal a khung a, a nihna takah chuan Carrick-a'n a enkawl tirh pawhin Dorgu aia bul ṭan tur zawka ngaih a ni.

Chutihrualin Amorim-a'n mual sira khel thei player Marcus Rashford, Jadon Sancho, Antony leh Alejandro Garnacho te a chhuahtir vek avangin Carrick-a tan duh thlan tur a tam lo. Mason Mount pawh mual sir lama khel turin a pawh theih ang a, no. 9-ah Benjamin Sesko chhawrin Bryan Mbeumo pawh a sir lamah a dah theih ang.

Left back pahnih Luke Shaw leh Tyrell Malacia te an dam ṭha a, pakhat zawk hi a dah hma thei bawk. Carrick hian academy a ngai pawimawh a, academy player zinga hmabak nei êng Shea Lacey tan hun ṭha a inher chhuak thei bawk.