MFA-in India aiawha silver late chawimawi

SAFF Futsal Championship (South Asian Football Federation)-ah India futsal team-in silver an la a, nimin khan India aiawh feh chhuak Mizo parukten Mizoram rawn thlengin Mizoram Football Association-in Lengpuiah chawimawina hun a hmang.

Mizo parukte hi Jonathan Lalrawngbawla (Zotlang), Vincent Laltluangzela (Tlangnuam), K. Roluahpuia (Tuikhuahtlang), Lalsawmpuia (Electric Veng), Lalrinzuala (Electric Veng) leh Lalsangkima (Electric Veng) te an ni a, India tan hmun pawimawh a chang pha.

SAFF Futsal Championship hi January 14-26, 2026 chhung khan Bangkok Thailand ah khelh a ni a, mipa leh hmeichhe inelna neih niin India team hi pahnihna ve ve an ni. Inelna hian SAFF ram pasarih India, Bangladesh, Bhutan, Maldives, Nepal, Pakistan leh Sri Lanka te an tel a, vawi khat ṭheuh an inkhelh kual hnunga a ti ṭha ber an champion.

Maldives-in an khingpui hneh vekin an champion a, India hian vawi thum hnehna changin ṭum hnih an inhnehtawk a, Maldives chauh an hneh lo. Mizo player-ten hmun pawimawh an chang a, Electric Veng tlangval Sawmpuia'n goal nga a khung a, Tlangnuam tlangval Vincent Laltluangzela 'n goal thum khungin K. Roluahpuia'n goal hnih a khung bakah Jontahn Lalrawngbawla'n goal khat a khung bawk.