Spain-in World Cup 2030 final thleng dawn

Royal Spanish Football Federation president Rafael Louzan-a'n FIFA World Cup 2030 final an thlen tur thu a puang. Inelna hi Spain, Portugal leh Morocco-ah te khelh a nih dawn bakah match hmasa pathum chu inelna kum 100 tlin lawm nan Uruguay, Argentina leh Paraguay-ah te khelh a ni dawn bawk.

World Cup 2030 hi khawmualpui pathum Europe, Africa leh South America-ah te khelh a ni dawn. Rafael Louzan chuan, "Spain hian inelna lian thlen a tlin tih vawi tam tak a lantir tawh a, 2030 World Cup thlengtu zingah pawh a hruaitu kan nih avangin final pawh kan ramah khelh a ni ang," tiin a sawi.

Spain-ah hian stadium lian Real Madrid khelmual Santiago Bernabeu leh Barcelona khelmual Nou Camp te a awm a, Spain Football Association president hian final khelhna tur erawh a sawi tel lo thung.

Chutihrualin FIFA-in final thlenna tur hi a la tichiang lo a, inelna thlengtu dang Morocco leh Portugal te pawhin final thlen hi an duh. Morocco hian final hi a thleng a nih chuan Casablanca-a Grand Stade Hassan II-ah khelh a ni dawn a, he stadium hi mipui 115,000 lenna tur niin kum 2028-ah sak zawh a ni ang.