Murray-a'n Nuggets chakpui zo lo

NBA regular season khelh mekah nimin zing khan Detroit Pistons chuan Denver Nuggets 109-107 in an hneh a, Nuggets point guard Jamal Murray-a free throw luh loh chu Pistons-in an vanneihpui a, Murray hian lut kim se chu overtime an khel ang.

Ball Arena, Denver-a inkhelah Murray a langsar a, American point guard Murray hian point 24 leh assist 10 nei mah se Nuggets chak nan a tawk zo lo. Pistons tan Cade Cunningham-a'n point 22 leh assist 11 a nei a, Tobias Harris-a'n point 22 neiin rebound vawi 8 a la bawk a, Pistons chak nan an thawhhlawk hle.

Denver Nuggets tan an thiampuipa Nikola Jokic-a la khel thei lo zel a, Jokic tel loin Nuggets an danglam. Jokic hi nikum December tawp lamah a khupah hliam tuarin tun thlengin a la inkhel thei lo a, Serbian center Jokic hi February tir lamah a rawn let beisei a ni.

Jokic bakah forward Aaron Gordon chu Milwaukee Bucks an hmachhawn ṭumin a inhliam a, doctor-te'n a hliam hi an endik mek a, a chawlh chen tur a hriat loh. Nuggets hian naktuk zingah Brooklyn Nets an hmachhawn leh nghal ang.