Indian team of the decade-ah Jeje a lang

India rama football thuneitu sang ber All India Football Federation chuan fans kaltlanga Indian Football Team of the Decade-a thlanna result chu a puang ta a, kum sawm liam ta chhunga Indian team player ṭha zual 11 thlanchhuah zingah Jeje Lalpekhlua a tel. 

AIFF hian online hmangin kum 10 chhunga India senior team tana inlan ṭha zual 11 thlanna hi a nei a, fan-ten January 3 thleng kha vote an thlak thei - player 29 zet AIFF hian a chhawpchhuak a, heta ṭang hian position tina vote hmu ṭha zual 11 chu a thlang chhuak.

Hnahthial tlangval Jeje hi tlarhmaah India captain chhuanvawr Sunil Chhetri nen inkawp tura thlan an ni a, Mizo Sniper hming lem an pek striker hi Mizo player zinga Indian Football Team of the Decade a lang awmchhun a ni.

Kum 2011-2020 inkar hian Indian senior team-in sulhnu tam tak an hnutchhiah - kum 2011 leh 2019 khan AFC Asian Cup an khel a, Nehru Cup (2012), Hero Intercontinental Cup (2018) leh SAFF Championship (2011 & 2015)-ah te an champion bawk. 

Jeje hi Nehru Cup-a champion team zingah a tel lo a, Asian Cup 2011-a khel lo bawk - mahse, Hero Intercontinental Cup (2018) leh SAFF Championship (2011 & 2015) team zingah a tel a, Asian Cup 2019 khel bawkin, player pawimawh a ni phak vek. 

India tan vawi 56 inlana goal 23 khung thei Jeje chuan, "Kum 10 liam ta chhunga India senior team player ṭha zual 11 zinga tel chu lawmawm duh tak a ni. Ka beisei phak loh thil a ni a, chutihrual chuan Best XI hi en ila, 'kan batch' tih tur hial khawpa khel ho nasa kan ni. 

"Anni nen hian kan khel ho deuh reng a ni ber a, Asian Cup 2019-ah phei chuan last 16 kan luh lohna kha a tlem hle," tiin Vanglaini a hrilh a,  Indian Football Team of the Decade a lang player-te chuan lan an phu vek thu a sawi. 

East Bengal striker Jeje hian kum 2011 leh 2015-a SAFF nomawi an chawi ṭumin final-ah goal a khung ve ve a, Intercontinental Cup (2018) a final an luh theihna inkhel pawimawhah Kenya lakah goal a khung bawk. 

Asian Cup 2019-a India-in team ṭha zawk Thailand barakhaih a, 4-1 a an sawp ṭum khan Jeje hian goal mawi bik a khung tawh bawk - Asian Cup 2019-ah hian an match tawp berah last 16 lut turin Bahrain inhnehtawkpui chiah an mamawh. 

Mahse, inelna thlengtu United Arab Emirates an hneh loh avanga dinhmun derthawnga ding India hian hun pek belhah penalty hmangin goal an chhuah a, 1-0 a Bahrain ngam loin an tla. 

Jeje hian 2011-2020 inkar hian a mimal ang pawhin chawimawina a dawng hnem hle. Kum 2011 hi India tana a inlan hmasak ber kum a ni a, match 15-ah goal riat ngawt khungsakin a hming a chher hle. 

Kum 2011-ah hian FPAI Best Young Player Award pek a ni a,  AIFF Emerging Player of the Year (2013),  Indian Super League Emerging Player of the League (2015), Federation Cup Top scorer (2015–16), Federation Cup Best Player (2015–16), FPAI Indian Player of the Year (2015–16) leh AIFF Player of the Year (2016)-ah te thlan a ni bawk. 

Jeje hian 2010-11 season-ah khan Pailan Arrows tan khelin league match 15-ah goal 13-a khung a, a theuneu lo hle - a hnuah Pune FC, Dempo SC, Mohun Bagan, Chennaiyin FC leh East Bengal tan a khel zui. 

Kum 10 liam ta chhung hian India senior team mai ni lo, club thlengin hlawhtlinna tam tak a chhar a, Mohun Bagan tan I League (2014-15) leh Federation Cup (2015-16) nomawi a chawi bakah Chennaiyin tan Indian Super League (2015 & 2017-18) season-ah te champion nomawi a chawi bawk.

Mohun Bagan tana I League nomawi a chawi ṭumin goal khung tam tawk lo mah se Fed Cup-a a champion puinaah erawh match ngaa goal riat khungin top scorer a ni a, best player a ni bawk - he season-ah hian Kolkata club tan match 28-ah goal 19 ngawt a khung. 

ISL 2015-a Chennaiyin an champion ṭum hian match 11-a khelhah goal ruk a khung a, assist vawi thum nei bawkin an champion nan player thawh hlawk a ni - he season-a Ligue 1 club Amiens tana khel mek Stiven Mendoza nena an inkawp chu Indian football titi tling a ni. 

Kum 2015 ISL-ah hian Emerging Player of the match-ah vawi li ngawt an thlang a, season tawpah Emerging Player of the Match chawimawina a dawng bawk. 

Chennaiyin hi 2017-18 season khan ISL-ah a champion pui leh a, South Indian club-in defending game an khel chungin match 20-a khelhah goal kua a khung a, assist vawi khat a nei thei - hemi season-ah hian hero of the match-ah vawi thum ngawt thlan a ni a, December-ah Fans' Player of the Month-ah thlan niin he season-a Indian player he dinhmun luah thei awmchhun hi a ni hial.

Jeje hian season hmasa tluan kha a khup hliam vangin a khel thei lo a, tun season-ah East Bengal zawmin lo kir leh tawh mah se ngai erawh a la awh rih lo. 

MEN’S TEAM OF THE DECADE

Goalkeeper: Gurpreet Singh Sandhu.

Defenders: Subhasish Bose, Sandesh Jhingan, Anas Edathodika, Pritam Kotal.

Midfielders: Halicharan Narzary, Anirudh Thapa, Rowllin Borges, Udanta Singh.

Strikers: Sunil Chhetri, Jeje Lalpekhlua.

WOMEN’S TEAM OF THE DECADE

Goalkeeper: Aditi Chauhan.

Defenders: Roja Devi, Ashalata Devi, Sweety Devi, Dalima Chhibber.

Midfielders: Ranjana Chanu, Bembem Devi, Ratanbala Devi, Dangmei Grace.

Strikers: Bala Devi, Anju Tamang.