Arsenal mualah Crystal Palace Inkhel pawimawh a ni - Arteta

Mikel Arteta chuan tun hnaia an khelh hmabak match pahnih chu an tan a pawimawh thu a sawi a, an result chuan Arsenal dinhmun thui tak a hril thei dawn niin a sawi.

Gunners hian zanin dar 1:30 hian Premier League khel turin Crystal Palace an mikhual dawn. January 18, Thawhṭanni zanah Newcastle United an mikhual zui leh ang. North London club hian season thara Champions League khelh an duh a nih chuan chak a pawimawh ang.

Tun hnaiah a zawnin match li chhung Arsenal an chak a, goal khat chauh an chhuah. An defender pawimawh Rob Holding-a'n 2024 thleng daih contract a ziak thar - English defender hi player pawimawh a ni zel dawn.

Arteta chuan, "Match khelh hmabak pahnih hi a pawimawh hle, heng inkhelte hian khawi lam hawi zawngin nge kan kal dawn tih a hril thei dawn niin ka hria. Tun hnaia chak duhna rilru kan neih ang kha kan neih chhunzawm ka beisei.

"Crystal Palace hi team ṭha tak an ni, team insawhnghet ṭha tak an nih avangin club lian zawk pawh an hneh thei. Team ṭha an nih bakah player mala ṭha tak tak an kawl. Fimkhur tak chung siin kan nawr ang," tiin a sawi.

Gunners hian Atletico Madrid aṭanga an lak Thomas Partey an chhawr thei tawh dawn, hrileng vanga chawl defender Gabriel Magalhaes pawh a inkhel thei leh tawh. FA Cup an khelh dawna kerek hliam Gabriel Martinelli erawh a chawlh a la ngai dawn.

Arsenal hian 2019 khan an tlarhma tichak thei tur player an zawng a, forward Wilfried Zaha hming a ri ring hle. Mahse, Lille aṭangin Nicolas Pepe an lei ta zawk a, pound maktaduai 72 man hian tun thlengin beisei erawh a la phak lo.

Tun hnai khan Zaha chuan trasfer bazar chungchang a sawi a, amah ngeiin Gunners zawm duh mah se North London club hian Ivory Coast tana a khelhpui Pepe an duh zawk niin a sawi, tun hnaiah Zaha a khelh ṭhat avangin a thusawi hian sawi zui a hlawh.

Zaha chungchang sawiin Arteta chuan, "Player ṭha tak a ni a, a chang chuan amah chauh pawh hian khingpuite a chhaih buai thei hle. Mahse tunah chuan Palace player a ni a, thildang sawi tur a awm lo," a ti. Spanish manager hian tlarhma a khel tur player an neih ṭhat tawk thu a sawi bawk.

Palace hian hliam vangin Gary Cahill, Scott Dann leh Mamadou Sakho te an chhawr thei dawn lo. Manager Roy Hodgson-a'n Eberechi Eze tan khelhna hun a siamsak leh a rinawm a, English rawlthar ball pet thiamna chhawr ṭangkai an tum leh ang.

Arsenal dinhmun a chhiat zual lai, chak ni hmel an hmuh theih loh karah Emile Smith Rowe hmel a rawn lang - English rawlthar duhawm hian number 10 dinhmun rawn luahin inkhel boruak a thlak danglam, zaninah pawh fans lamin an hmuh chak a ni dawn.

Fans leh media ṭhenkhat chuan Manchester City thiampuipa Kevin De Bruyne nen an khaikhin leh der tawh. Mahse, Arteta erawhin, "Emile, tiin sawi rawh u, ani chuan hun bul a ṭan ve dawn chauh.

"Player naupang ṭhenkhat chu inkhel pahnih velah an che ṭha a, a hnu lamah hmuh zui tur an awm lo fo. Chuvangin beiseina leh rinna dah san nghal lutuk loh a ṭha zawk, an tan phurrit kan siamsak thei," tiin a player chu a la dim hle.

Arsenal hian senior player karah an mahni chher chhuah - Bukayo Saka, Smith Rowe, Joe Willock leh Reiss Nelson te an chhawr chho mek. Spanish manager hian Arsenal duh dan taka khel thei player a remkhawm mek a ni.