Ibra hoin Milan vannei

Thawhlehni zan Coppa Italia inkhelah AC Milan an vannei, an mikhual Torino nen 0-0 a an inhnehtawk hnuah penalty shootout hmanga chak zawk zawn a ni a, mualneitu lamin 5-4 in hnehna an chang.

Team pahnih hi kar hmasa lawk khan Serie A lamah an intawng, Milan hian 2-0 a hnehna an chan avangin cup inelna lamah pawh rinkai an ni. Mahse mikhual team lamin an tlarhnung an remphui avangin an tan hna a awlsam tawh bik lo.

November 22 hnua a vawi khat nan Zlatan Ibrahimovic chuan inkhel bul a ṭan thei ve leh ta a, Swede striker hian a awma ball a dawn hnuah mawi takin volley mah se goal bar pawnah a kal - hun chanve bak khelhtir a la ni rih lo thung.

Inkhel boruak a sang a, midfielder Milinkovic-Savic-a'n a ball pek sual siamṭhat a tumna lamah forward Rafael Leao a ti tlu - Milan lamin penalty beisei mah se pek an ni lo. Thil thlengah hian bench lama ṭhu keeper Gianluigi Donnarumma chu red card pek ngai khawpin a khawsa hial.

Penalty hmangin tlang tur zawn a ni a, Milan tana pettu panga ten an khung vek laiin Torino midfielder Tomas Rincon pet chu keeper Ciprian Tatarusanu chuan lo dansakin a team a chakpui.