NorthEast United-in coach an ban

Indian Super League club NorthEast United chuan Thawhlehni zan khan Bengaluru chu 1-1 in an inhnehtawkpui a, league match sarih chhung a zawna an chak zawh tawh loh avangin coach Gerard Nus an ban zui. 

Highlander tan Luis Machado chuan minute 27-naah goal hmahruai a khung a, mahse, minute 49-naa Bengaluru tana Rahul Bheke shot 'naran' tak chu goalkeeper Gurmeet Singh chuan holam takin a chhuah - Nus-a'n a hna a chan phah bawk. 

Spanish coach Nus enkawlna hnuaiah Highlander hian bul an ṭan ṭha hle - an league match hmasa berah Mumbai City an hneh nghal a, Kerala Blasters leh FC Goa an inhnehtawkpui hnuin East Bengal an hneh leh bawk. Mahse, Kolkata club an hneh hnuah match sarih chu an chak zo tawh lo. 

NorthEast United chuan an coach an ban chhan hi an duhdan leh ngaihdan a inan loh vang niin an sawi a, a hmun ruak luah tur hian assistant coach Khalid Jamil an ruat zui - an inhnehtawkpui Bengaluru hian coach Carles Cuadrat an ban tawh bawk a, assistant coach Naushad Moosa chu coach atan an ruat lailawk rih. 

Highlander tan Lalengmawia (Apuia) leh Rochharzela ten inkhel bul an ṭan a, Vaivakawn rawlthar Apuia hi hero of the match-ah thlan a ni.