Aizawl FC an awl dawn

I League second round chu vawiin aṭangin khelh ṭan a ni dawn a, Aizawl FC an awl ang. Vawiin tlai dar 2:00 hian Gokulam Kerala leh Roundglass Punjab te an inkhel dawn a, tlai dar 4:00-ah Sundeva Moonlight leh Indian Arrows an inkhel leh ang a, zan dar 7:00-ah Mohammedan leh Churchill Brothers te an inhmachhawn ang.

I League-ah hian team 11 an awm avangin round tinin team pakhat an awl ṭhin. Round hmasa berah Neroca an awl a, tun ṭumah Aizawl FC an awl dawn. Mizo club hi January 20, Nilaini tlai dar 2:00-ah Gokulam Kerala nen an inkhel ang.

Gokulam Kerala hian Chennai City an hneh loh ṭum khan bul ṭantu zingah Mizo midfielder Lalromawia an chhawr a, bench-ah Zodingliana a awm bawk. Vawiina an khingpui tur Roundglass Punjab-ah Mizo an awm lo.

Sudeva Moonlight tan pawh Lalliansanga Renthlei leh Sairuatkima ten bul an ṭan a, bench-ah Vanlalzahawma leh Lalramhmunmawia ten an awm. Indian Arrows tan Vanlalruatfela Thlacheu-in match hmasa berah goal a khung nghal a, Lalchhanhima Sailo-in captain hna a chelh bawk.

Mohammedan-in Sudeva an hneh ṭumin Vanlalbiaa Chhangte squad-ah la awm lo a, Covid-19 kai vanga training zawm tlai Hriangtliang tlangval hi tun ṭumah pawh hian a inlan a rinawm lo zawk. An khingpui Churchill Brothers-ah Vanlalduatsanga-a'n match hmasa berah a khel tluan thung.