Sanchez hmaah Hammers an zawr

Alexis Sanchez-a'n minute 14 leh second 29 chhung lekin West Ham lakah hattrick a siam. Arsenal lakah Hammers 5-1 in an zawr a, inkhelh ban-ah Arsene Wenger chuan Slaven Bilic-a naute chuan an mahni khelmualah ngei pawh inrintawkna an nei loa a hriat thu a sawi!

Inrinni zan Premier League inkhelah Arsenal tan Sanchez-a'n hattrick a siam bakah Mesut Ozil goal khung tur a siamsak a, Alex Oxlade-Chamberlain chuan goal khat a thawh ve bawk. West Ham goal neih chhun hi Andy Carroll khung niin - Dimitri Payet free kick petin bar a per lo kal let chu a tauh lut.

Arsenal manager Wenger chuan, "Inkhel thunun chungin goal tam tak kan khung. West Ham kha an mahni khelmualah ngei pawh inrintawkna nei thei lo khawpin kan siam thei," tiin a sawi.

West Ham hian Upton Park kalsanin tun season aṭangin khelmual thar London Stadium an luah a, beisei an phak rih lo. League match ruk an khelh tawhah vawi hnih chiah hnehna an la chang a, tunah hian table-ah 17-na an ni mek.

French manager Wen-ger chuan goal thum khungtu Sanchez fak zuiin, "A theihna a sang a, huaisen taka a beih hram hram ṭhin bakah a class a sang bawk. Ani hi chuan thil danglam leh hlu bik min tih sak thei ṭhin reng a ni," tiin a sawi.

Barcelona aṭanga a lakluh Chile international hian league a match hnuhnung pahnihah goal nga a khung ta. Tun season Premier League match 14 khelh tawh aṭanga goal 11 khung tawhin Chelsea striker Diego Costa nen top scorer an ni - a club hi point 31 hmuh pui tawhin pahnihna a nih pui mek bawk.

West Ham manager Bilic chuan, "Chhuanlam siam tur a awm lo! Player inhliam kan ngah a, tihsual kan ngah bawk. Mualpho taka kan awm avangin fans leh club chungah ngaihdam ka dil," a ti.