Sheffield United an chak ve ta

Sheffield United-in tun season Premier League-a hnehna chang turin match 18 an nghah a ngai a, Thawhlehni zan khan Newcastle United 1-0 in an hneh. 

Bramall Lane-a inkhel nung ṭha takah hian Newcastle defender Ryan Fraser chu minute thum chhung leka John Fleck leh David McGoldrick te laka yellow card a chawi ve ve avangin minute 45-naah hnawhchhuah a ni a, Sheffield-in player 10-a khel lakah hun ṭha an bawhpelh lo.

Second half-ah minute 15 chuang hret a la awm tihin Blades-in Federico Fernandez handball vangin penalty an hmu a, substitute Billy Sharp-a'n keeper Karl Darlow bumin minute 73-naah goal awmchhun a khung.

Liverpool aṭanga manto taka an lakluh Rhian Brewster-a'n hun tawp lamah goal hnihna a khung teuh a, English forward ball pet hian goal ban a per. Blades hian match 17-ah chak nei loin vawi hnih an inhnehtawk a, vawi 15 an chak lo - Premier League history-a season bul ṭan chhe ber record an chelh a, tun ṭumah erawh hnehna an chang thung.

Sheffield United boss Chris Wilder chuan, "Mi ṭhenkhat chuan red card leh penalty sawi zui an châk ka ring. Ka tan erawh chuan hnehna kan chan hi a hlu ber a , kan tan chuan result lawmawm a ni. Chak tur chuan vanneih a ngai ṭhin a, kan khel chhia tihna erawh a ni lo," tiin a sawi.

Blades hian point nga an hmu a, an chunga awm West Brom chu point thum chauhin an pha lo. Chutihrualin 17-naa awm Brighton-in point 14 an hmuh tawh avangin Wilder-a hote hian relegation zone an la chhuahsan lawk lo ang.