Real chhanhimtu Sergio Ramos
El Clasico khelh a nih hmaa sawi hlawh ber chu Lionel Messi leh Cristiano Ronaldo ni mah se inkhelh zawha player langsar ber erawh Real Madrid captain Sergio Ramos a ni - kum 30 a upa defender hian minute 90-naah Real si phurh a sut a, Nou Camp-ah a team tan point khat hlu tak a hlawh chhuak.
Barcelona tan Luis Suarez chuan minute 53-naah goal hmahruai a khung a, Uruguayan striker hian El Clasico match li a khelh tawhah match thum a goal khungna ni turin Neymar-a freekick chu a tauh lut. Mahse, an mikhualna ramah Real an beidawng duh lo. Ronaldo-a'n hun ṭha a khawhral hnuah Ramos a inlar a, Spanish defender hian match 33 chhung a zawna tlawm hmel an hmuh tawh lohna ni turin an si phurh sutna goal a tauh lut.
Real Madrid-in vawi 14 khelh tawhah table chung ber an luahlum zel a, khelh zat in angah an hnuai chiaha awm Barca aia an sanna chu point ruk a ni. Catalan club erawh league match thum chhung chak hmel an hmu ta lo a, tun season La Liga-a assist 13 neitu nichunga assist ngah ber ni mek Neymar chuan yellow card a chawi avangin an league match leh tur a khel thei dawn lo.
Barca an tawlhthlu
Barcelona-in beisei angin inkhel bul an ṭan lo a, nidanga an attacking game na tak ang kha hmuh tur a awm lo. Messi-a'n freekick hmanga a hun ṭha neihchhun chu Real keeper Keylor Navas chhaih buaina tham a ni lo a, Ronaldo-a'n firsthalf-ah vawi thum zet hun ṭha nei thungin Luka Modric chu Real tan midfield-a roreltu a ni a, Mateo Kovacic leh Isco te nen an inthlawp ṭha hle.
Chawlhlawk hnua an insiam-
ṭhat hnuah Barca-in Suarez hmangin goal khung mah se Messi-a'n a hun ṭha neih a chhawr chhunzawm lo a, Real nen an inhmachhawn hnuhnung paruka goal khung miah lo forward hian substitute Andres Iniesta hnen aṭanga ball ṭha tak a hmuh chu goal-ah a chantir thei lo.
Captain 'comeback'
Ramos-a'n minute 90-naah chak tura inngai tawh Barca beiseina a chhu chhia a, kum 30-a upa defender hian tun hi hun tawp dawna a team a chhanhim vawi khatna a ni lo. Kum 2014 Champions League final-a Atletico Madrid an hneh ṭumin Ramos hian injury time-ah an si phurh sutna goal a khung tawh a, 2016 UEFA Super Cup final-a Sevilla an hneh ṭumin hun pek belhah tho an si phurh sutna goal a khung tawh bawk.
Zinedine Zidane-a enkawlna hnuaiah Real hian point 102 hlawhchhuah theih aṭangin point 82 an hlawh chhuak tawh a, French manager hian Jose Mourinho-a'n khualmuala La Liga match 17 chhung tlawm hmel hmu lo record a lo siam tawh chu a nihrual ta chiah.
Thukhawchang
Real boss Zinedine Zidane chuan, "Barca inrintawkna kan tihchhiat phahin ka hre lo. Kan inhmachhawn hma pawhin point ruk thoin kan inthlau a, zanin result hian engmah a thlak danglam lo. Hnathawh tur tam tak kan la nei a, tuna kan tih theih chu kan match khelh leh tur atana inbuatsaih a ni," tiin a ṭawng pawr duh lo.
Barca coach Luis Enrique chuan, "Hma kan sawn a ngai a, kan khelmuala point hloh hi a pawi lehzual. Tuna kan awmna leh kan tum ram chu la inpersan tak a ni. Hun tawp thlengin game khelh a ni tih kan hriat a ṭul a, Madrid lehpel tur chuan kan hmabak match zawng zawnga chak vek a ṭul tawh," tiin an dinhmun a ṭhat loh thu a sawi.