Conte hoten Etihad Stadium luhchhuah

Chelsea-in Etihad Stadium-ah goal li an khung a, Manchester City-in an pet goal ve lo. English defender Gary Cahill-a'n an lamah a tihluh vangin Blues chakna zat erawh 3-1 a ni.

Goal li

Pathianni zan Premier League inkhel hmuhnawm bikah City-in Cahill-a own goal vangin first half-ah hma an hruai a, second half erawh mikhual ta a ni. Chelsea striker Diego Costa-a'n darkar khatna chiahah siphurh sutna goal a khung a, City defender Nicolas Otamendi a bum dan chu 'class' tak a ni.

Spanish international striker Costa hian minute 10 hnuah Willian goal khung tur a siam sak a, Blues counter attack a ropui. Hun tawp hma hretin Eden Hazard-a'n chak nemnghehna goal a khung a, Belgian winger hi City defender Aleksandar Kolarov-a'n a um pha lo hle.

City an buai

Argentine foward Sergio Aguero-a'n league-ah goal 10 khung tawh mah se Blues nen erawh tun season-a vawi hnih nan hnawhchhuah a, match li hrem a ni dawn. City forward Aguero hian mawi lo takin Chelsea defender David Luiz a tlawh lui a, hemi vanga buaina kal zelah City midfielder Fernandinho-a'n red card a hmu bawk.

City player pahnih hian Leicester, Watford leh Arsenal te an hmachhawn thei dawn lo a, Aguero bik hi Boxing Day-a Hull City an hmachhawn thleng hrem a ni thung ang. Spanish manager Pep Guardiola chuan buaina thleng chu pawi a tih thu a sawi a, ngaihdam a dil bawk.

Conte a ropui

September 24-a Chelsea-in Arsenal 3-0 zet an hneh loh hnuah 3-4-3 formation an hmang a, league match riat chhung a zawnin an chak tawh. Italian manager Conte-a'n player ngai hlir a hmang a, City nen hian a vawi khat nan player pakhat a thlak - inhliam Nemanja Matic aiah Cesc Fabregas a thlak.

Chelsea-in match 14 khelh zawh aṭangin point 34 an hmu a, hmahruaitu an ni. London club hi September thla tawpah erawh match ruk khelhah point 10 hmuin table-ah pariatna an ni a, an hmasawnna thlirin Conte hnathawh hi a ropui hle.

Team Dinhmun

# Team Pld W D L GD Pts

1 Chelsea 14 11 1 2 21 34

2 Arsenal 14 9 4 1 19 31

3 Liverpool 13 9 3 1 18 30

4 Man City 14 9 3 2 15 30

5 Tottenham 14 7 6 1 14 27

6 West Brom 14 5 5 4 3 20

7 Man Utd 13 5 5 3 3 20

8 Everton 13 5 4 4 1 19