F1 champion Rosberg a chawl

Nico Rosberg chuan world champion a nih aṭanga ni nga hnu lekah Formula 1 intlansiak a chawlhsan thu a puang! Mercedes driver hian November 27 khan Abu Dhabi Grand Prix-ah hnehna changin champion nomawi a chawi.

Kum 31-a upa Rosberg chuan, "Ka tum ram ka thleng tawh, tunah hian a sang berah ka awm mek - a ropui ka ti hle. Kum 25 chhung intlansiak khawvel ka luhchilh tawh a, hun harsa nuam leh hrehawm tam tak ka tawn hnuah ka thawhrim rah sengin hlawhtlinna ka chang thei. Tunah chuan ka hmabak ka hlen tawh," tiin Formula 1 intlansiak a chawlhsan thu a sawi.

German driver Rosberg chuan, "Ka tan thawnthu a tawp tawh a, ka lo kir tawh lo ang," tiin motor intlansiakna sang berah let leh a tum tawh lo.

Kuminah intlansiak vawi 21 awm aṭangin Rosberg hian vawi kua hnehna a chang a, world champion vawi thum ni tawh leh nomawi kawltu ni bawk Lewis Hamilton chu point nga a hnehin a nomawi a chhuhsak.