Everton-in Wolves an hneh

Everton-in season thara Champions League khelh beiseina nei chhunzawmin turin Thawhlehni zan khan Wolverhamtpon Wanderers 2-1 in an hneh. Molineux Stadium-a inkhelah hian

Alex Iwobi-a'n minute rukna lekah Toffees tan a khung a, minute 14-naah Ruben Neves-a'n Wolves tan siphurh sutna goal khung mah se Michael Keane-a'n minute 77-naah Everton chakna goal a khung.

Everton boss Carlo Ancelotti-a'n goal khung thei striker Dominic Calvert-Lewin hliam vangin a chhawr thei lo a, Cenk Tosun bench-ah a dah bawk avangin bul ṭantu zingah striker tiha chhal theih a hmang lo. 

Amaherawhchu mual sir aṭangin Iwobi a hlauh awm a, Arsenal winger hluiin goal a khung theih nan hian James Rodriguez leh Lucas Digne te an thawh hlawk hle.

Wolves erawhin Raul Jimenez awm loh an tuar a, Mexican forward hi November thlaa Arsenal nen an inkhelh ṭuma a lu ruh a khik avangin a inlan thei lo. Molineux-ah Jimenez-a'n inkhel a en a, a ṭhianten khelmuala an inlan leh hlan an nghakhlel khawp ang. Wolves boss Nuno Espirito Santo pawhin an dinhmun chu a ṭhat loh thu a sawi.

Everton manager Carlo Ancelotti chuan, "Richarlison leh Calvert-Lewin te an awm loh avangin khelh dan phung kan thlak a ngai a, Wolves kan hmachhawn bawk avangin a harsa dawn tih kan hria. Mual sir aṭangin Iwobi leh Digne te hmangin kan nawr a, kan game plan a thawk ṭha viauin ka hria. Inkhel entu an awm loh avangin khualmualah kan khel ṭha zual a, kan mualah pawh entu 2000 kan neih ṭum chuan Chelsea kan hneh thei a ni," tiin a sawi.