Goal li chauh kan khung kha ka ui - Sanga

Chanmari FC-in Zirtawpni zanah Aizawl FC 4-1 in an sawp a, Mizoram Premier League Season 5 final lut turin dinhmun ṭha takah ding mah se an result-ah coach Lalsangzuala Hmar lawm a kim lo.

Inkhelh banah Sanga chuan, "Kan khel ṭha a, amaherawhchu ka ṭawng sual ang em aw, 4-1 a inkhel a han tawp kha chu ka ui a ni," tiin a sawi.

Chanmari an chak chian avangin coach thusawi hi MPL presenter-in mak a ti a, "Kha aia tam zawk kha khung theiah in inngai em ni?," tiin a zawt nawn a, Sanga chuan, "A chiang alawm, nang pawhin kan inkhel kha i thlir lo em ni?" tiin a zawt let a, an khelh dan enin goal liah a lungawi lo.

Chanmari coach, "Chanmari mipuite leh ka player-te chiang rawh u aw, minute 90 a la awm a nia aw. Sapatal suh u, khawvelah hian engkim a thleng thei. Chapona hi ka duh lo, tuna kan tih theih chu thiam taka player-te
ṭawiawm a ni a, second leg-ah tun aia tam zawkin min rawn ṭawiawm turin Chanmari mipui ka sawm e," tiin final an la luh chian loh thu a sawi.

December 9, zan dar 7:00 hian Chanmari FC leh Aizawl FC ten semifinal second leg an khel dawn a, AFC boss K. Malsawmkima'n inkhelh banah final lut tur a la chian loh thu a sawi rualin, "Kan la tlawm lo," a ti - inkhel hmuhnawm tak thlir tur a la awm ang.

Season ṭan hmain AFC president chuan a zawna vawi thum champion a duh thu leh chumi ti thei tur player la turin AFC enkawltute a hrilh thu a sawi tawh a, hei vang hian Chanmari FC laka tho leh turin field chhung leh pawnah ṭan an la ngei ang.