Athlete of the Year Usain Bolt

Olympic gold medal pakua zet neitu Usain Bolt chu a vawi ruk nan International Association of Athletics Federations male Athlete of the Year award hlan a ni. Hmeichhe lamah 10,000m world record siama Olympic gold medal latu Almaz Ayana chu female award a dawng ve bawk.

Kum 30-a upa Bolt hian Rio Olympic-ah khan 100m, 200m leh 4x100m-ah te gold medal a la vek a, heng inelna pathumah hian Beijing leh London-ah te a lo hlawhtlin tawh bawk avangin a zawna inena pathuma Olympic gold medal hui fai vek thei awmchhun a ni.

Jamaican sprinter ropui Bolt chuan, "Chawi-mawina ka dawn theih chhan chu ka thawhrim vang a ni. Ka vawi ruk dawnna a ni nachungin ka dawn hmasak ber nen a hlutna a danglam chuang lo," a ti. Bolt hian 2017 World Athletics Championship zawh hunah a chawlh tur thu a sawi chiang tawh.