India player tan Thailand boruak a ṭha lo

Thailand Open khel turin Badminton Association of India (BAI) chuan team a tir chhuak a, inelna neih hma aṭangin Indian player tan chanchin duhawm hriat tur a vang hle - hrileng leh result ṭha lo vangin dinhmun duhawm lo takah an ding.

Tournament khelh ṭan dawn niah Saina Nehwal leh H.S. Prannoy te chu hrileng an kai tih hmuhchhuah a nih vangin an inlan thei lo; Saina-i pasal Parupalli Kashyap pawh a in hnuhdawh a ngai hial.

Thawhlehni khan PV Sindhu a inlan a, Rio Olympic silver medalist hi world number 18 Mia Blichfeldt nen darkar khat leh minute 14 an inkhelh hnuah 21-16, 24-26, 13-21 in a chak lo.

Mipa singles lamah world number 13 B. Sai Praneeth pawh tualchhung player Kantaphon Wangcharoen lakah 16-21, 10-21 a chak loin a zinkawng a tawp ve nghal - Indian badminton tan chanchin lawmawm tia sawi chi a ni lo ang.

Kidambi Srikanth leh Sourabh Verma te inhmachhawn tur an ni a, world number 1 hlui Srikanth hian Covid-19 lakah an fihlim em tih endik dan kawng chu fuh tawk lo nia a hriat thu a sawi.

Twitter lamah Srikanth hian a hnar thi leh an buaipuina a tarlang a, inelna hmun an thlen hnuah vawi li ngawt endikna an tawh thu a sawi bawk. An hriselna dinhmun endik a nih danah Indian tlangval hi a lawm lo tih a hriat theih.

BAI chuan an player enkawl dan chu ṭha tawk lo an tih thu an sawi nghal a, damdawi lam thiam hnenah Srikanth chungchang hi an thlen nghal bawk a ni.

Season hmasa khan hrileng vangin tournament an khel mumal thei lo, kuminah hian Olympic neih a nih dawn avangin infiamna khawmpui liana inlan tur chuan tournament khelh tam a ngai dawn.