Heat aia sa zawk 76ers
Joel Embiid-a point 45 neih hmangin Philadelphia 76ers chuan Miami Heat 137-134 in an hneh a, hnehna chang tur erawhin 'overtime' an khelh a ngai thung a ni.
Philadelphia 76ers hi tun hnaiah a zawnin vawi thum an tlawm, nimin zingah erawh Embiid-a'n point a neih hnem bakah rebound vawi 16 zet a la a, assist vawi li neiin steal vawi nga a nei bawk - point 29 neitu Danny Green chuan a thlawp ṭha bawk.
Inkhel dangah LeBron James chuan point 26 a neih zinga 22 ngawt chu chawlhlawk hmain a nei hman a, American star hian Los Angeles Lakers chu ṭha taka bul ṭanin team ṭha Houston Rockets 117-100 in an hneh.
NBA champion tan hian James bakah player dang panga ngawtin point 10 chuang an nei thei. NBA champion leh Western Conference hmahruaitu ni bawk hian tun regular season bikah khualmuala an zin chhuahin hnehna an la chang vek.
Brooklyn Nets chuan point 18 zeta an hniam zawk hnuah Denver Nuggets 122-116 in an hneh, an player ṭha leh thiampuipa ni bawk Kevin Durant chuan point 34 a neih bakah assist 13 leh rebounds vawi kua a la.
Western Conference lama pahnihna Utah Jazz chuan Cleveland Cavaliers 117-87 in an hneh a, an chak theih nan Donovan Mitchell (27 points) leh Jordan Clarkson (21) ten an thawh hlawk hle.
NBA Results
Brooklyn Nets 122 - 116 Denver Nuggets
Los Angeles Lakers 117 - 100 Houston Rockets
Utah Jazz 117 - 87 Cleveland Cavaliers
San Antonio Spurs 112 - 102 Oklahoma City Thunder
Indiana Pacers 104 - 95 Golden State Warriors