Reds leh United an sen lar zo lo

Premier League nomawi chawi tum Liverpool an tawlhthlu. Pathianni zan khan khualmualah 3-1 zeta hma an hruai hnuin Bournemouth an inlehthal tir a, 3-4 in an tlawm. Reds hian a chung bera awm Chelsea chu point li zetin an phak lo ta a, pahnihna Arsenal an phak lohna chu point khat a ni.

Manchester United-in Jose Mourinho enkawlna hnuaiah harhtharna chan inbeisei mah se an beisei 'harhna' an hmu hleithei lo. Red Devils hian Everton lakah 1-0 a hma an hruai reng hnuin Mourinho substitution siam an tuar a, minute 85-naa tlan luhtir Marouane Fellaini penalty chawi avangin point hnih an hloh.

Comeback ropui

Bournemouth khelmualah Liverpool-in first half-ah inkhel an thunun a, Sadio Mane chuan minute 20-naah mikhual team tan goal hmahruai a khung nghal. Reds hlim authawm pawh a reh fel hmain Divock Origi chuan an goal hnihna a khung chhunzawm ve lehnghal bawk.

Chawlhlawk hman a nihin Reds-in 2-0 in hma an hruai a, inkhel thlak danglamtu chu minute 55-naa tlan lut Ryan Fraser a ni. Cherries midfielder hian minute khat pawh khelmualah hun a hman tlin hmain penalty a hlawh chhuak a, goal-a chantir turin Callum Wilson-a'n harsatna a nei lo.

Liverpool-in yard 20 vel aṭanga Emre Can goal hmangin an goal thumna an khung leh a, chak tura rin chu Reds an ni. Mahse, Cherries-in ngaihdan dang an nei a, inkhel a la tawp lo tih an chiang. Penalty hlawh chhuaktu Fraser chuan 3-2 ni turin Premier League-a a goal hmasa ber a khung a, Centre-back Steve Cook chuan minute 78-naah an si phurh a sut zo!

Klopp enkawlna hnuaia khualmuala league match 23 an khelha goal 38 chhuahtu Reds an insiamṭha lo a, Chelsea aṭanga loan-a Cherries zawmtu Nathan Ake chuan injury time-ah chakna goal a khung - Klopp-a'n Simon Mignolet aia a rin zawk keeper Loris Karius ball man ngheh tawk loh avanga lut a ni.

Klopp a tlawm lo

Liverpool manager Jurgen Klopp chuan, "Kawngkhar kan hawn miau avangin an rawn tlan lut a, goal mawi tak tak khung nan an hmang a, chak loh kha kan phu a ni. Kan chak loh miau avangin rilru a nuam lo a, mah se a chang chuan thil duhawm lo hi min beng harh turin kan mamawh ṭhin. Zanina kan thil tawn hian min pui thei ang tih ka chiang a, eng kawng mah hi mam taka zawh theih an ni lo a, kawng bumboh lai awm vek an ni," a ti.

Klopp chuan sawi chhunzawmin, "He hmunah hian nuam tawl tur kan ni lo. Kha aia ṭha zawka khel thei kan ni a, 2-0 a nih vang maiin inkhel a tawp tawh tihna a ni lo. Ka naute hian kan kuta awm tawh kan thlauh thla tih an hria a, Bournemouth kha an comeback theih nan hun ṭha kan siam sak a ni," tiin a naute khelh danah a lawm lo.

Harh thei lo United

Everton khelmualah chak ngei tumin Manchester United an lenglut a, Zlatan Ibrahimovic chuan minute 42-naah a match hnuhnung pangaa a goal rukna ni turin United goal hmahruai a khung - kum 35-a upa Swede striker ball pet hian keeper a khum hnuah post leh cross bar a perin goal line a pel hram. United tan Ander Herrera chuan bar a pet per bawk a, Kevin Mirallas, Gueye leh Enner Valencia te chuan David de Gea tan hna an siamsak vek bawk.

United manager Jose Mourinho-a'n hnehna chan ngei a duh a, minute 85-naah Marouane Fellaini a tlan luhtir. Mahse, Everton midfielder hlui hi United goal neih sa venghimtu ni loin point hnih an hlohna tura player thawh hlawk a ni!

Belgian midfielder hian minute 85-naah ṭul lo takin Everton midfielder Idrissa Gueye a ti tlu a, Premier League-a penalty 18-a peta vawi 16 khung thei Leighton Baines tan an si phurh sut turin harsatna a awm lo. United hian hun tawp nan minute 10 chiah a awm tawh tiha goal an chhuah ṭhin avangin point sarih an hloh tawh a, league match 13 an khelh tawhah point 20 chiah la hmuin Premier League-a an season hman chhiat ber an hmang mek.

Mourinho thukhawchang

Manchester United boss Jose Mourinho chuan, "Team ṭha zawk kan ni tih chu khelmualah khan hmuh turin a awm a, mah se kan chak si lo. 2-0 a hmahruai theihna hun kan nei a, post pet per nana kan hman laiin annin an hun ṭha neih goal-ah an chantir thung si a ni," a ti.

Portuguese manager chuan sawi chhun-zawmin, "Kan khelh dan phu tawk result kan hlawh chhuah loh miau avangin engemaw tak chu ngaihtuah a ngai a ni. Ka naute an khel ṭha a nih chuan result ṭha pawh ka beisei a, a pawi ber chu kan khelh ṭhat ngaihtuaha table-a kan dinhmun insawi danglam hleithei lo hi a ni," tiin a naute a sawisel duh lo.