Bike khalh tura hriak thih Marquez
"I naupanna tuman ngainep suh se," tih thu ti diktu chu Marc Marquez hi a ni. Kum 23-a upa Marquez hi October 16-a tlan zawh tak Japan Grand Prix-a hnehna a chan khan intlansiak hmabak pathum la awm chungin world champion a ni chiang der tawh - kum 2013 leh 2014 season-ah khan MotoGP-ah hian a lo champion tawh bawk a, MotoGP-ah title pathum la thei naupang ber a ni.
MotoGP a luhchilh aṭanga Honda bike khalhtu Marquez hian season thum chhungin hnuhma hraw leh hrawl pui pui a hnutchhiah ṭeuh tawh a, bike intlansiak huanga hming dai tawh ngai lo tur Valentino Rossi, Hailwood leh Phil Read te angin category chi hrang pathuma world champion ni thei palina a ni chiah bawk.
Bulṭanna duhawm
Marquez hian a vawi khat nan kum 2008 khan World Championship-ah a hming a rawn ziak ve ṭan a, hemi kum hian intlansiak a hmachhawn vawi ruk naah podium a lawn phak! Hetihlai hian kum 15 chauha upa a la nih avangin khawvel mak tih a hlawh. Mahse, a season hmasa ber hi chu hliamin a tihbuai nasat avangin sawi zui tur a ngah lo - a bike khalh chu KTM a ni.
Intlansiak a luhchilh kuma chhinchhiah tlak tak pakhat chu 125cc 2008 Portuguese Grand Prix kha a ni. Kha intlansiakah khan Marquez hian kum 15 leh ni 56 chauha upa ni chungin pole position a chang a, Spanish rider zingah motorcycle racing world championship-a he dinhmun luah thei naupang ber a ni hial.
A kum leh 2009 a lo her chhuah chuan podium-ah a rawn lawn leh nghal mai a, 2010 season khan 125CC-ah inlanin intlansiak hnuhnung 14 aṭangin vawi 10 zet hnehna chang chungin khawvela a ngam ta. 125 World Champion a nih kum aṭang hian Marquez hian hnunglam a hawi tawh lo.
Hmalam panin
Spain tlangval hi 2011-2012 khan Moto2 World Championship-ah a inlan zui a, Moto2 inelnaah hian intlansiak vawi 32 a hmachhawn
aṭangin ṭum 16 hnehna a chang a, vawi 25 zet podium-ah lawnin point 579 a hmu - kum 2012 khan world champion a ni nghe nghe.
Rider ngaihven hlawh hian Moto2-a hun a hman chhung hian hnuhma ropui tak tak a hnut chhiah leh nual hman a, chung zingah chuan Phillip Island-a an intlansiak ṭuma 38-na aṭanga bul-
ṭan chunga podium a lawm phak leh a champion kuma Valencian GP-a a hnung ber aṭanga bulṭan chunga pakhatna a ni theite kha Moto2 bike intlansiak a awm chhung zawnga an sawi zui tawh tur a ni ang.
Kiang ru...
12 July, 2012 a ni a, MotoGP team Repsol Honda chuan world champion pawh lo ni tawh Casey Stoner hmun ruak luah turin Marquez chu kum hnih chhung atan contract an ziahpui. Kum 2013 khan Dani Pedrosa nena inkawpin Marquez hian bike intlansiakna sang berah bul a ṭan.
Inelna hniam zawk lama sulhnu lo nei ṭha tawh Marquez hi MotoGP intlansiak a hmachhawn hmasak berah pawh a inthlahrung lo nghal hle. Qatar Grand Prix-ah khan podium-ah a hmel kan hmu nghal, a tluk loh chu khatihlai pawha tawnhriat lo ngah tawh Jorge Lorenzo leh Valentino Rossi te chiah an ni!
Texas-ah American GP an tlan zui leh a, a teammate Dani Pedrosa hnehin hnehna a chang nghal. Marquez-a'n hnehna a chan hian kum 20 leh ni 63-a upa chauh a la ni a, kum 30 liam ta a khatih hunlaia kum 21 mi Freddie Spencer-a'n record a lo siam tawh chu a rawn khum leh nghal pang.
MotoGP-a a season hmasa berah hian intlansiak vawi rukah hnehna changin a pumpuiah point 334 a hmu a, Kenny Roberts (1978) angin bike intlansiakna sang bera a kum khatnaah a champion nghal thei a ni - hei mai bakah hian MotoGP chanchina world champion ni thei naupang ber a ni bawk.
Kum 2014 a rawn inher chhuak a, intlansiak hmasa ber Qatar-ah champion lai Marquez hian hnehna a chang lehnghal, pahnihna Rossi nen an inthlauhna chu second 0.259 chiah a ni. Intlansiak pakua - Texas, Argentina, Spain, France, Italy, Catalan, Netherlands, Germany leh Indianapolis-ah te Marquez hian hnehna a chan chhunzawm vek, tuma chuh buai phak lohin a champion title a humhim.
A awlsam vek lo
Mi ṭha, thiam leh theihna nei sang bikte tan pawh khawvel hi a awlsam vek bik lo. Kum 2015 kha Marquez tan intlansiak khawvela a hun tawn tawh zingah chuan hun harsa leh theihnghilh tawh loh tur a ni.
Intlansiak hmasa bera kawngkawi pakhatnaah a chet fuh loh nghal avangin 25-naah a tawlhhnung hman a, a tawpah pangana ni leh thei mah se kum hmasa nena khaikhin chuan bul-
ṭanna duhawm lo tak a ni. Argentina-ah lap hnih chauh tlan hmabak an nei tawh tihin Rossi nen an inumna lamah a chesual a, 2014 Australian Grand Prix hnua a vawi khat nan intlansiak a tlan tluan thei lo.
Kut vei lam zungṭang na vangin harsatna a tawk zui a, intlansiak ṭhulh phah lo mah se Italy, Catalunya, Silverstone leh Motorland Aragon-ah te a tlan tluan ve thei lo. Boruak ṭha nei hleithei lo mah se Australia-a hnehna a chan chiah khan rider pakua chiahin an la tih theih Grand Prix 50-ah hnehna a chang tling ta chiah - hetihlai hian kum 22 leh ni 243-a upa chauh a la ni.
Kum 2015 season intlansiak hnuhnung ber dawt Malaysia-ah MotoGP chanchina thil thleng zen zen lo kan hmu, intlansiak tawp lamah Marquez hi a elpui Rossi-a'n a tlawh tlu..? Italian rider hian hremna a hmachhawn phah nghe nghe. GP hnuhnung ber Valencia-ah pahnihna dinhmun luah mah se a champion nomawi chu Yamaha rider Lorenzo lakah a chan. Kuminah erawh rider ṭha bik a nihzia a lantir leh chiang hle a, intlansiak hmabak pathum an la neih laiin a champion fel hman der - rider ṭha leh thiam bik a nihzia chu sawi nawn ngai loin a thiltihah en mai a finthlak.
Marquez chuan, "Season hmasa ka thil tawn aṭang khan zirlai tam tak ka zir chhuak a, inbuatsaihna
ṭha leh hautak zawk ka neih phah. Ka taksa mai bakah ka rilru thlengin a puitling tawh zawk a, chu chuan nasa takin min pui," tiin a champion theih chhan a sawi.
Spanish rider chuan sawi chhunzawmin, "Intlansiak chhinna lamah ka chesual nasa hle, a chhan chu inelna tak taka a ṭha ber ka nih theih nan tun hma lama ka tih ngai loh tih theih ngei tuma ka beih ṭhin vang a ni," tiin hnehna chang tura a thawhrim thu a sawi tel bawk.
Rider ropui tak takte tih theih ngai loh ti a, an thlen phak ngai loh rawn thleng theitu Marquez hi a kum a la tam lo a, bike intlansiak khawvelah eng tiang chiaha sulhnu ropui nge a hnutchhiah theih dawn tih chu khawvel hriat chak a ni - hunin a la hril ang chu.