Zirtawpni aṭangin Governor's Cup

Mizoram Basketball Association leh Assam Rifles te buatsaih Governor's Cup chu December 9, Zirtawpni aṭang hian Hawla Indoor Stadium, Republic Vengthlangah khelh ṭan a ni tawh dawn. Inelna hi Mizote leh Assam Rifles te in-ṭhian ṭhatna atan tih a ni.

Zirtawpni chawhma dar 10 hian opening ceremony neih a ni dawn a, match hmasa berah Mizoram Super League champion Khatla TBL leh Assam Regiment te an inhmachhawn nghal ang.

Governor's Cup-ah team pariat telin group hniha ṭhenhran an ni. Group A-ah Khatla TBL, Zarkawt Serpents, Assam Regiment leh Assam Rifles te awmin Group B-ah Tuikual South, Mission Veng Vikings, Rajputana Rifles leh Rajput Regiment te an awm thung.

Inelna semifinal hi December 13-ah khelh a ni ang a, final hi ruahman dan chuan December 15-a khelh tur a ni.