Highlanders an chuai

Pathianni zan Indian Super League-ah semifinal lut turin NorthEast United-in Kerala Blasters lakah chak mamawh mah se an mamawh point thum an hlawh chhuak thei lo a, khualmualah 1-0 in an tlawm.

Kerala Blasters tan ṭum dang ang bawkin CK Vineeth chu chhandamtu a ni a, khawtual tlangval hian minute 66-naah he inkhela goal awmchhun hi a khung - Highlanders lamin a chhanletna tur an neih theih loh avangin semifinal an beiseina a thamral ta a ni.

Inkhel chu

Inkhel ṭan aṭanga minute 18-na lekah Highlanders-in hun ṭha nei nghal mah se goal-ah an chantir thei lo a, Seityasen Singh chuan Blasters keeper Graham Stack zawnah tak a pet. Highlanders-in chak an mamawh tih inhriain an hlauhawm chhunzawm a, Sevilla midfielder hlui Romaric-a ball shot chu Arsenal keeper hlui Stack tan buaina tham a ni lo. Ivory Coast international hlui hian freekick aṭanga a hun ṭha neih a chhawr thei lo bawk a, Seityasen-a'n hun ṭha dang nei leh mah se goal hmaah a hriam tawk lo.

Chawlhlawk hman a nih hnuah Highlanders lamin inkhel thunun chhunzawm mah se goal khungtu chu Kerala Blasters an ni a, Bengaluru aṭanga Kerala zawmtu CK Vineeth chuan ISL match ruk a khelha a goal nga na ni turin a khung. NorthEast lamin Emiliano Al-faro hmangin chhanletna hun nei mah se Lazio striker goal shot hian post a per a, Kerala tan Mohammed Rafi chuan woodwork a pet per ve bawk.

Coppell a lawm

Kerala Blasters coach Steve Coppell chuan, "Kan khelmuala kan match hmasa bera kan tlawm hnuah tun dinhmun hi kan thleng thei a, ka hlim a ni. Ka player-te hnenah tha nei lo leh chau taka an awm apianga an mahni
ṭantu mipuite ngaithla ṭhin turin ka hrilh a, min ṭan tura mipui tam tak lo pungkhawm hian ka player-te hnenah chakna a pe ṭhin a ni," tiin Jawaharlal Nehru Stadium, Kochi-a fans 54,000 pungkhawmte hnenah lawmthu a sawi.

Liverpool khaw chhuak, Manchester United player hlui, Manchester City boss hlui ni bawk chuan sawi chhunzawmin, "Ka player-te khan dinhmun derthawng takah kan ding tih an inhria a, theihtawp kan chhuah loh chuan kan hmabaka thil duhawm tak inchhawp chu kan ban phak dawn lo tih an hre bawk. Chu chuan an rilruah phurna nasa tak a pe a, kawng engkimah hma kan sawn a ni," tiin a phur hle.

Vingada a vui lo

NorthEast United coach Nelo Vingada chuan, "Semifinal an luh avangin Kerala ka lawmpui a, Kochi mipuite pawh ka lawmpui takzet a ni. Team pahnihin hun ṭha kan nei ve ve a, Kerala-in an hun neih chhawra goal an khung laiin keini chuan kan chhawr thei lo thung a, chu chu kan danglamna a ni. Guwahati mipuite hnenah lawmthu ka sawi a, zaninah hian semifinal lut zo lo mah ila a tawp thlengin kan bei a ni tih hi min hriat sak se ka duh a ni," tiin a sawi.

Portugal boss hlui chuan ISL hmasawnna tur sawi nghalin, "League hi a tawi em em a, duhthusamah chuan season thar kan inelna tur atan tun aṭanga inbuatsaih lehnghal mai hi ka duh hial a ni. Kum 2018 aṭanga chuan Asian Football Confederation dan zulzuiin Asian pakhat leh foreigner pali chiah squad-ah awm thei se la, chu chuan team tan hmasawnna a thlen ang a, Indian player ten hma an sawn phah bawk ang," a ti.

Hmabak

A thiam pali zinga Kerala Blasters an tel ve leh tak avangin semifinal-a team inhmachhawn tur pawh a chiang tawh. Tun season ISL-a semifinal lut hmasa ber Mumbai City chuan semifinal match hmasa berah Atletico de Kolkata chu December 10 zan hian an lenchilh ang a, a tuk Pathianni zanah Kerala Blasters chuan Delhi Dynamos an mikhual ve thung ang.

Semifinal hi double legged a khelh tur a nih avangin December 13 zanah Mumbai-in ATK an mikhual ve leh ang a, December 14 zanah Delhi chuan Kerala an mikhual ve leh thung ang. ISL final hi December 18 zanah khelh tur a ni.