Vawiinah Australian Open semifinal

Australian Open mipa semifinal chu vawiinah khelh a ni dawn a, tennis ngainatute tan chuan 'semifinal duthusam' tia kan sawi a nih pawhin thu uar lutuk kan ni lo ang.

Vawiin chawhma dar 9:00 hian Carlos Alcaraz leh Alexander Zverev ten final luh an inchuh dawn - Grand Slam title aṭanga tehin Alcaraz ropui zawk mah se, inchhuang thei an awm bik lo.

Tennis player langsar pahnih hi vawi 12 an intawng tawh a, vawi ruk ve ve an chak! Chawhnu dar 2:00-ah Novak Djokovic leh Jannik Sinner te an inkhel dawn bawk a, hei pawh en châkawm tak a ni.

Hello Alcaraz

Kum 22 mi lek ni chungin Alcaraz-a'n Grand Slam paruk ngawt a la tawh a, a la champion lohna awmchhun erawh Australian Open a ni - AO-a champion a, Grand Slam la kim thei naupang ber nih a duh dawn.

Hetihlai hian a khingpui tur Alexander Zverev erawh player ṭha tak ni siin, Grand Slam a la la ngai lo! Australian Open, French Open leh US Open-ah te final a lut vek tawh a, a chak lo zawkah a ṭang vek.

Kum 28 mi Zverev-a tan Grand Slam anchhia vai kiang a hun a, world number 1 Alcaraz a hneh a nih ngat chuan inringtawk takin final a hmachhawn thei ang.

Djokovic vs Sinner

Mi tam takin khawvela tennis player ropui bera an ngaih chu Novak Djokovic a ni a, Grand Slam ringawt pawh 24 a la tawh - tun AO-ah hian a champion leh a nih chuan tennis khawvela Grand Slam la hnem ber a ni ang.

Mahse, Djokovic-a tan chuti maiin a awlsam dawn lo - a hmaa ding tur hi Jannik Sinner a ni tlat!Kum 24 mi tennis player hi Australian Open-ah match 19 chhung tlawm a nei tawh lo a, kum 2024 leh 2025-ah a champion.

Sinner-a'n a zawna vawi thum champion a tum a, vawi 10 an inhmachhawn tawha vawi ruk a hneh theih Djokovic hi zuam lo mah se, a hlau lo ang.

Tlawm ve lo

Djokovic hi kum 38 mi a ni tawh a, a khelin tun hma a phak tawh lo tih a chiang. Semifinal a luh danah pawh vanneihna a tel - fourth round-ah a khingpui tur Jakub Mensik chu hliam vangin a inhnukdawk a, inkhel chau loin quarterfinal a lut.

Quarterfinal-ah a tlawm ngei dawna a lan laiin hliam vang bawkin a khingpui Lorenzo Musetti a inhnukdawk leh a, semifinal a thleng. Amah ngei pawhin, "Ka puanthuah ka tel hman a ni," a ti hial.

Mahse, hei vang ngawta zuam chi erawh a ni dawn lo. Djokovic chuan, "Ka elpuite hi tuna keimah ai hian an ṭha em? kan tih chuan, an ṭha zawk tih ka pawm. Mahse, chu vanga tlawm nghal mai ka tum lo a, ka tha tawp thlengin ka bei ang," a ti a, Grand Slam 24 hi tlem a la ti tlat!