Liverpool-in goal an surtir

Premier League-ah beisei phak lo mah se, Champions League lamah erawh Liverpool an kal zel a, playoff khelh buai ngai loin round of 16 an lut - Reds hian Nilaini zan khan an mikhualna ramah Qarabag chu 6-0 ngawtin an sawp!

Liverpool tan Alexis Mac Allister chuan goal hnih khungin, Florian Wirtz, Mohamed Salah, Hugo Ekitike leh Federico Chiesa ten goal khat ṭheuh an khung a, mikhual Qarabag-in a chhanletna tur an neih loh avangin Reds an chak chiang hle.

Merseyside club hian UCL league stage match riat an khelhah vawi ruk hnehna changin, table-ah pathumna an ni a, hneh loh nei lo Arsenal leh vawi khat chiah tlawm Bayern Munich te chiah tluk loh an nei - pathumna an ni.

Champions League-a Premier League club inlan panga zingah Arsenal, Liverpool, Tottenham Hotspur, Chelsea leh Manchester City-te last 16 an inpetkai a, Newcastle United-in playoff hmangin last 16 beiseina an la nei ve dawn bawk.

A awlsam

Kum 2026-ah Liverpool-in Premier League-ah an khingpui hneh an la nei miah lo a, match nga an khelh tawhah vawi li draw neiin, vawi khat an tlawm a, beisei an phak lo hle - Champions League-ah erawh thawnthu a danglam daih thung.

Qarabag laka goal khung turin an nghak rei lo. Minute 15-na lekah Mac Allister chuan goal hmahruai a khung - corner aṭanga ball kal chu Virgil van Dijk-a'n lo tauh thlain, hei hi Allister-a'n a tauh ve leh a, goal-ah a lut.

Minute ruk hnu lawkah Reds-in goal an khung belh - a khungtu chu Florian Wirtz a ni. German midfielder hi Liverpool-ah a tlangnel tawlh tawlh a, a hmuhnawm tawlh tawlh.

Goal dang lut loin chawlhlawk hman a ni a, mahni muala khel an ni bawk a, Liverpool an tlang dawn, tia sawi ngam hial a ni tawh. Mahse, Reds-in an lo la duhtawk lo - second half-ah goal li an khung belh!

Hello Salah

Second half ṭan aṭanga minute ngana lekah Salah-a'n freekick a hlawh chhuak - Dominik Szoboszlai-a'n ball a tawk zeuh a, Salah-a'n mawi zetin goal-ah a chantir. Anfield thawm chu ring tak a ni!

Salah-a'n a ban phar chungin Reds tana a goal khung a lawm a, November hnua Liverpool tana goal a khung leh hmasak ber a nih avangin he goal hian inrintawkna a pe ang - a goal lawm pahin Liverpool badge a khawih a, Kop tan mit titlai a tling dawn.

Minute sarih hnuah Ekitike-a'n goal khung a bansan thei lo tih pholangin an goal lina a khung a, Mac Allister-a'n hnai set sawt aṭangin a tlawh goal zui - minute 90-naa Chiesa goal khung chu Qarabag hliama chi phul belhna chauh a ni tawh.

Liverpool khel a hmuhnawm a, Reds ṭantuten Premier League-ah hmuh chhunzawm an beisei dawn - Inrinni zan dar 1:30-ah Newcastle an mikhual zui dawn a, Arne Slot-a Liverpool an insiamṭha nge, Qarabag nem vang tih kan hria ang.