Europe-ah Arsenal an chak vek
Champions League group stage-ah Arsenal-in an khingpui an hneh fai vek. Gunners hian Premier League-ah an hmelma Manchester United hneh lo mah se Nilaini zan khan FC Kairat chu 3-2 in an hneh. Mikel Arteta hoten point 24 hmu mah se Kazakhstan club Kairat laka goal hnih an chhuah avangin an lawm a kim lo ang.
Emirates Stadium-a inkhelah Arsenal tan Viktor Gyökeres, Kai Havertz leh Gabriel Martinelli ten goal khat ṭheuh an khung a, Kairat tan Jorginho leh Ricardinho ten an khung ve bawk. Gunners tan nomawi hlawh chhuak turin tlarhnung tihphui a ṭul dawn.
German forward Havertz-a'n khup leh malpui hliam vanga harsatna a tawh aṭanga ni 357-naah inkhel bul a ṭan a, goal thumah inrawlh vekin man of the match-a thlan a ni. Minute hnihna lekah Havertz-a ball pek chu Gyökeres-a'n lalutin ṭha zetin a khung.
Defence laiah Riccardo Calafiori leh Cristhian Mosquera te an inkawp a, Italian defender hian penalty a chawi avangin minute sarihnaah Kairat-in Jorginho hmangin siphurh an sut. Mahse, inkhela chungnung zawk Gunners tan Havertz-a'n minute 15-naah a khung a, goal mawi bik a ni.
Minute 36-naah Havertz-a ball pek luh chu Gyokeres-a'n hmun hlauhawmah pe lutin goal ruakah Martinelli-a'n a khung. Assistant referee-in offside-ah ngai mah se VAR hmanga ennawn hnuah goal-ah pawm a ni. Gunners-in inkhel thunun mah se second half hun pek belhah Ricardinho-a'n mikhual team tan a khung a, 3-2 in inkhel a tawp.
Arsenal manager Mikel Arteta chuan, "Kai Havertz-a'n a theihna sang tak a rawn lantir a, goal a khung bakah assist a neih avangin a khelh danah a lungawi thlak. Minute 45 khel turin ruahmanna kan siam sa a, bul a ṭan zel ang em tih chu kan ngaihtuah ang," tiin a sawi. Gunners hian last 16 an luhchian tawh avangin Kairat lakah hian team ṭha ber an luhtir lo.
Europe lamah Arsenal hi che ṭha mah se Premier League lamah tun hnaiah result ṭha an nei lo. Gunners hian January 31, Inrinni zan dar 8:30 hian Elland Road-ah Leeds United an tlawh dawn a, pakhatna dinhmun sawhnghet turin chak ngei an mamawh ang.