Haaland-a'n goal a khung leh ta

Manchester City tan Erling Haaland-a'n goal a khung a, Pep Guardiola hoten Nilaini zan khan Galatasaray 2-0 in an hneh. English club hian point thum hlu tak an hlawhchhuah avangin point 16 an hmu a, pariatnaah an inhlankai avangin knockout playoff khelh ngai loin last 16 an lut.

Etihad Stadium-a inkhelah City tan Haaland bakah Rayan Cherki ten an khung. January thlaa lakluh defender Marc Guéhi leh forward Antoine Semenyo te erawh league phase khel tur squad-a an ziahluh loh avangin an inlan thei lo a, knockout phase-ah squad hi ziah ṭhat tur niin last 16-ah an inlan thei tawh ang.

Man City tan last 16 lut turin chak ngei a ṭul a, inkhel ṭantirh aṭangin an goal bawh pawh a na. Minute thumna lekah Haaland-a'n hna tak aṭangin a tauh lut lo a, minute 10-naah erawh cool zetin a khung. Norwegian striker hian Jeremy Doku ball pek luh ṭha zet chu um lutin keeper Ugurcan Cakir rawn chhuak chu hmuin mawi zetin a pet khum. Nikum Krismas hnua open play aṭanga a khung lehna hmasa ber a ni.

First half-ah Pep-a hoten inkhel an thunun a, hrem vanga khel thei lo Rodri hmunruak luahtu Nico O'Reilly pawhin box pawn aṭangin kawh zetin a pet a, keeper Cakir-a'n a dansak. City an chungnung chhunzawm a, minute 29-naah Cherki-a'n goal hnihna khungin Doku-a'n tha a thawh hlawk hle.

Galatasaray-in second half-ah an nawr na hret a, Victor Osimhen ball pet ṭha zet chu keeper Gianluigi Donnarumma-a'n a dang. Nigerian striker vanneih zan a ni lo a, City-in goal an chhuah lo. Pep-a hote 2-0 in an chak a, a sang pariat zinga an tel avangin February thlaah Champions League match an nei dawn lo a, City tan chanchin ṭha a ni.