Chelsea-in Conte hote an hneh

Champions League-ah Chelsea-in last 16 lut turin an manager hlui Antonio Conte enkawl Napoli 3-2 in an hneh a, Italian club erawh an muala an chak loh avangin Europe-a inelna sang ber aṭangin an tla.

Nilaini zan inkhelah hian Chelsea tan Enzo Fernandez-a mintue 19-na lekah penalty aṭangin a khung a, mualneitu lamin Antonio Vergara (33') leh Rasmus Hojlund (43') te hmangin first half-ah an lehthal. Mahse, second half-ah João Pedro a rawn inlar a, Brazilian forward hian goal hnih khungin London club a chakpui.

Napoli hi Premier League-a Chelsea champion puitu Antonio Conte enkawl a ni a, chak mamawh an nih bakah mahni muala khel an nih avangin inkhelh hma aṭangin an buk a rit zawk. Mahse, Liam Rosenior-a'n halftime a hmang ṭangkai a, second half-ah a luhtir Cole Palmer-a'n assist vawi hnih a nei a, Joao Pedro goal hnih khung hi a siamsak ve ve a ni.

Manchester City aṭanga inzir chhuak Palmer hi London club chhuahsan a, Manchester khawpuia kir leh tura sawi a ni a, a zawm tura an sawi erawh Man United a ni thung. Rosenior-a'n Palmer chhuah loh tur thu a sawi tawh a, Napoli laka a theihna a lantir avangin club thuneitute lam pawhin a hlutna an hriatchian leh phah ang.

Napoli hian an mual Stadio Diego Armando Maradona-a an match hnuhnung 21-ah vawi hnih chiah an tlawm a, a hneh theitua tel hi Chelsea tan chanchin lawmawm a tling. Rosenior chuan, "Ka player-te hian an manager zah leh ngaihna em em an chan a, hetiang kara anmahni enkawl tura min pawm hi ka tan chuan chanchin lawmawm a tling. Kan team ṭhat nan theihtawp ka chhuah a, hetiang zan duhawm hi kan tawn chhoh zel ka beisei," tiin a sawi.

Chelsea hian January 31, Inrinni zanah West Ham United an mikhual dawn a, Premier League-a a sang pali zinga awm turin chak ngei an mamawh. Napoli erawh Conte hnuaiah a zawnin vawi thum UCL knockout stage an thleng pha lo a, Serie A lamah hmahruaitu Inter Milan point kuaa an phak loh avangin insiamṭhat an mamawh viau bawk.