PSG leh Newcastle-in playoff khel dawn

UEFA Champions League, league round tawp zanah Newcastle United leh champion lai Paris Saint Germain 1-1 in an inhnehtawk a, PSG-in hma takah Vitinha hmangin hmahruai mah se Magpies-in Joe Willock hmangin an sut. Team pahnihte hi a sang pariat zingah an tel pha lo a, playoff hmangin last 16 luh a ngai dawn.

Parc des Princes-a inkhelah AFCON khelh hnuah Achraf Hakimi a rawn kir a, an ṭhat theih dan berin PSG an inlan. Mualneitu PSG an hlauhawm nghal a, minute khatna lekah Newcastle fullback Lewis Miley handball vangin penalty an hmu nghal. Penalty aṭangin Ousmane Dembele-a'n hma hruai theihna hun ṭha nei mah se Magipes keeper Nick Pope-a'n ṭha takin a dang.

Penalty hlah mah se PSG an hnual phah lo a, minute riatna lekah Portuguese midfielder Vitinha'n box pawn aṭangin mawi takin a pet goal a, penalty dangtu Pope-a'n a ban pha lo. PSG-in nawr chhunzawmin, Dembele-a'n chance ṭha nei mah se goal a khung thei lo a, a vanneih zan a ni lo.

Goal dang lut loin halftime an hmang mai dawna a lan laiin Newcastle-in goal an khung - hun pek belhah Joe Willock chuan Dan Burn-a siamsak chu hnai tak aṭangin a head lut a, PSG keeper Matvei Safonov tan dan ngaihna awm lo.

Second half-ah PSG an hlauhawm zawk a, goal khungtu Willock-a'n hmahruaina goal khung mah se a offside avangin sut leh a ni. Sandro Tonali leh goal ruk khung tawh Anthony Gordon ten an hun ṭha neih an chhawr ṭangkai thei lo a, Harvey Barnes-a'n hun tawp dawnah hnai tak aṭangin goal zawnah a pet thei lo bawk a, Barnes hian khung ngat se chu a sang pariatah Newcastle an awm thei ang. Goal dang lut zui loin hun a tawp a, team pahnihte point khatah an lungawi a ṭul.

PSG leh Newcastle hian point khat chiah an hmuh avangin playoff hmanga round of 16 an luh a ngai dawn. Newcastle-in January 31, Inrinni zan hian Anfield-ah Liverpool an hmachhawn leh nghal dawn a, February 4, Nilainiah Carbao Cup semi fianl-ah Manchester City nen an inkhel lehnghal dawn a, an hmabak a ko hle.