Atletico Madrid ngam loh Bodo/Glimt

Nilaini zan Champions League inkhelah Spanish club lian Atletico Madrid chuan Bodo/Glimt 2-1 in an hneh lo a, last 16 lut turin playoff an khelh a ngai dawn - Norwegian club Bodo/Glimt hian Manchester City an hneh tawh bawk!

Riyadh Air Metropolitano, Madrid-a inkhelah mualneitu Atletico chu rinkai zawk an nih angin inkhel an thunun a, minute 15-na lekah Alexander Sørloth-a'n hmahruaina goal a tauh lut nghal a, Atletico chak zawk tura ngaih an ni.

Bodo/Glimt an beidawng duh lo a, kar hmasaa Manchester City hnehtu club hian awlsam taka Champions League mangṭha an tum bik lo a, beiseina tlemte an neih chu a hlawhtlin theih nan theih tawpin an ṭang.

Minute 34-naah Bodo/Glimt-in goal an khung ta nge nge a, defender Fredrik Sjovold-an hnai tak aṭangin an si phurh a sut a, Bodo/Glimt an phur sawt. Second half-ah pawh Norweigian club an hlauhawm a, minute 59-naah Kasper Høgh-an buai nuai nuai karah a pet goal a, Bodo/Glimt-in hma an hruai.

Atletico-in goal khung tumin nawr mah se Bodo/Glimt tlarhnung an din khawng tlat avangin goal an khung thei lo a, 2-1 in Bodo/Glimt an chak.

Atletico Madrid hi an chak loh avangin table-ah 14-naah an awm a, a sang pariat zinga tel an beiseina chu a thamral. An mikhual Bodo/Glimt erawh an huaisen rah an hmu a, point kua hmuin 23-naah an awm. An hnuaia awm Marseille, Pafos leh Union Saint-Gilloise te nen an point hmuh zat inanh mah se an goal difference a ṭhat zawk avangin playoff khel turin an tling.

Chutihrualin Bodo/Glimt tan thlamuang taka awm a la hun lo a, playoff-ah vawi 15 champion tawh Real Madrid leh season hmasa finalist Inter Milan chu an tum theih zingah an tel.