Thilmak thlentirtu Sporting-in Bilbao an hneh

Portuguese club Sporting Lisbon chu tuma rinkai ni lo chungin Champions League table-ah pasarihnaah an awm a, point 16 hmuin Manchester City chungah an awm. Sporting hian Nilaini zan khan Athletic Bilbao chu 3-2 in an hneh a, direct-in round of 16 an lut.

San Mames, Bilbao-a inkhelah mualneitu Athletic Bilbao-in minute thumna lekah Oihan Sancet hmangin hma an hruai a, an hmahruai chhung erawh a rei lo - minute 12-naah Sporting defender Ousmane Diomande-a'n corner aṭangin an si phurh sutna goal a tauh lut ve nghal.

Minute 28-naah Bilbao Gorka Guruzeta-a'n a team hma hruai nawnpui mah se minute 62-naah Francisco Trincao-a'n a sut leh nghal a, injury time-ah Bilbao keeper Unai Simon-a dan per chu Alisson Santos-an pet lutin Sporting a chakpui.

Tun season Champions League-ah beisei phak bakin Sporting an khel ṭha a, an last 16 zinkawng a awlsam bik lo a, kar hmasa khan champion lai PSG an hneh. Knockout round an khelh hunah pawh chet ṭhat chhunzawm zel an duh ang.