PSV beiseina titawptu Bayern

Nilaini zan Champions League inkhelah round of 16 lut chiang tawh Bayern Munich chuan PSV Eindhoven chu 2-1 in an hneh a, playoff khelh an beiseina an tihtawpsak.

Bayern-in last 16 an luh tawh avangin player rinrawl an chawlhtir nual a, Harry Kane aiah Nicolas Jackson lutin, veteran keeper Manuel Neuer aia Jonas Urbig a lut bawk.

Philips Stadium, Eindhoven-a inkhelah mikhual team Bayern-in inkhel an thunun zawk a, Vincent Kompany naute hi an ṭhat dan berin inlan lo mah se PSV lakah an chungnung zawk tho.

Team pahnihten first half-ah goal an khung theih loh avangin second half nghah thlen a ngai. Minute 58-naah Jamal Musiala-a'n hnai set sawt aṭangin hmahruaina goal a khung a, goal luh theih nan rawlthar duhawm Lennart Karl a ṭangkai hle. Nikum July-a a inhliam hnuah Musiala-a'n inkhel bul a ṭan vawi khatna a ni a, goal a khung nghal.

Minute 78-naah PSV in Ismael Saibari hmangin goal khung ve mah se an hlim chhung a rei lo. PSV phur hman viau mah se minute 84-naah substitute Harry Kane-a'n chiang takin a pet goal a, Bavrians hma a hruai nawnpui. Kane hian tun season Champions League-ah goal riat a khungna chiah a ni. PSV in nawr chhunzawm mah se defender Mauro Junior-a'n red card a hmuh zui avangin thawh chhuah ngaihna a awm tawh lo a, Champions League an mangṭha.

Bavarians hi tun season UCL-ah an che ṭha a, hmahruaitu Arsenal chiah hneh loin pahnihnaah an awm. Inhliam vanga ni 200 dawn a chawlh hnuah Jamal Musiala a dam leh tawh a, tlarhma lamah Kane, Michael Olise leh Luis Diaz te an awm bawk avangin champion tura rinkain zingah an tel.