Sterling leh Chelsea an inṭhaṭhen

English winger Raheem Sterling chu a khelh mekna club Chelsea nen inremsiamin a contract an titawp. Kum 31 mi Sterling hian thla 18 contract la nei mah se club hotute nen an inbiak hnuah tihtawp a rilruk ta zawk.

Sterling hian 2022 khan Manchester City aṭangin an elpui Chelsea hi pound maktaduai 47.5-in a zawm a, Blues tan vawi 81 inlan hmanin kum thum leh a chanve hnuah a chhuahsan ve dawn ta.

City winger hlui Sterling hian 2015 khan a chawr chhuahna Liverpool aṭangin City a zawm a, Citizens tan macth 225 inlanin goal 91 a khung a, English winger ṭha berte zinga mi a ni hman. Chelsea a zawm hnuah erawh beisei a phak lo a, Arsenal-ah loan-in a khel hman hial.

Sterling hi Chelsea player zingah hlawh hnem berin, kar khatah pound 325,000 a hlawh a, Blues tan competitive match a khelh hnuhnung ber erawh March 2024 daih tawh kha a ni. Inkhel loa hlawh tam tak a neih avangin club tan contract tihtawp a finthlak a, inbiakna an neih hnuah an inrem thei ta.

Chelsea chuan thuchhuah siamin, "Chelsea player a nih chhung zawnga a hnathawh avangin Raheem-a chungah kan lawm a, a kal lehzelna turah duhsakna kan hlan a ni," tiin Sterling an thlah liam.