Milan mualah Juve an vannei

Hun tawp dawna Cristiano Ronaldo-a penalty chhuih luh hmangin Juventus chuan AC Milan laka an si phurh an sut hram. Coppa Italia semifinal first leg inkhelah Italian team lian pahnih ni 1-1 in an inhnehtawk.

March 4, Nilaini zan hian Turin khawpuiah second leg khelh a ni dawn a, inhnehtawk a awm thei tawh lo ang. Semifinal lehlamah Inter Milan chu Napoli lakah si khat faiin an hnufual mek thung a ni.

Juve hian Pathianni zanah league match an khel leh nghal dawn, dar 7:30-ah Brescia an mikhual ang. Milan erawhin Thawhṭanni zanah Torino an hmachhawn ve leh chauh ang. Tun kar tawp Serie A inkhel ngaihven hlawh ber atan chuan Pathianni zan dar 1:15-ah Inter Milan leh Lazio an inhmachhawn ang.

Ningani zan San Siro-a inkhelah goal kan hmu har, second half minute 61-naah Ante Rebic chuan hnai takaṭangin ball kang lai a pet lut a, minute 71-aah Milan defender Theo Hernandez chu yellow card pahnihna hmuh vangin an hnawtchhuak.

Player pakhata tam zawk Juventus lamin an tamna an chhawr ṭangkai thei mai lo, khualmualah an tlawm ngei dawn niin a lang hman. Hun tawp hma deuh chiahin Ronaldo-a scissor kick chuan Davide Calabria ban a fuh a, VAR hman a nih hnuah penalty an chawi, si phurh sut nan an hmang zui.

Kum 35 mi Ronaldo-a'n a goal khung a chhunzawm zel, season hman laiah club leh ram tan inelna hrang hrangah match 35 a khelh aṭangin goal 35 a khung tling ta chiah; a kum bakah season kal laia a match khelh zat leh goal khung zat chu 35 vek a ni mek.

Juventus hian kar hmasa khan Hellas Verona an hneh loh avangin Serie A hmahruaitu an nihna chu Inter Milan lakah an chan, cup inelna lamah pawh an tlarhnung phui lo vangin an buai zel - keeper Gianluigi Buffon-a'n Rebic, Hernandez leh Zlatan Ibrahimovic te goal khung tur ṭha taka a dan vangin goal an chhuah tlem.

Old Lady manager Maurizio Sarri chuan, "Kan match hnuhnung nena khaikhin chuan tlarhnung aṭanga ball kan inpek chhuah dan kha chu a ṭha zawk, khatiang kha a nihphung tur pawh a ni reng a ni.

"Mahse, ven theih ngei tura ngaihah goal kan chhuah ṭhin, holam taka kan goal-ah an khung a nih chuan a aia tama thungrulh a ngai ṭhin a, hna a hautak tawh ṭhin. Chak zo lo mah ila first leg chauh a la ni hi kan vannei, kan mualah chuan tihsual nei loa tlang kan tum ang," a ti.

Inter Milan lakah goal hnih khung hmasa mah se AC Milan an tlawm a, Italian champion Juve lakah goal an khung hmasa leh chungin an chak zo chuang lo. Amaherawhchu Milan manager Stefano Pioli chuan a naute khelh dana a lawm thu a sawi.

Milan manager Pioli chuan, "Ka naute kha engthawl leh nuamti taka inkhel turin ka fuih a, chutiang tak chuan khelmual chhungah an che ni pawhin ka hria, result kha duhthusam ni chiah lo mah se an khelh dan khan min ti lawm takzet.

"Ka hmuh dan chuan penalty an hlawh dan kha a awm lo ka ti, Ronaldo-a'n ball a dawn hma khan Juve player kha Ibra lakah an foul hmasa tawh. VAR khan chumi chu en tel loin Calabria-a handball chauh kha an en leh si, thutlukna lai tak chu a ni lo," a ti.