Blues-ah Palmer a nghet - James

Chelsea captain Reece James chuan Manchester United nena sawi zawm hlawh mek, an thiampuipa Cole Palmer chu Chelsea-ah a ngheh thu a sawi a, "Chelsea bak a ngaihtuah lo," a ti.

Blues hian UCL-a an match hnuhnung berah Napoli chu 3-2 in an hneh a, he inkhelah hian hliam dam hlim Palmer hi bench aṭanga luhtir a ni a, goal khung lo mah se, assist vawi hnih a nei.

James chuan, "Chelsea player a ni a, Chelsea-ah a rilru zawng zawng a pe. Player tam takin transfer lai chuan bourak an nei ṭhin a, chutiang chu a ni mai.

"Palmer hi ṭha takin a awm a, kan hnena a awm thei hi kan lawm hle," a ti a, an thiampuipa chuan rilru dang a put loh thu leh, an hnena cham reng tura an duh thu a sawi.

England international Palmer hian hliam a neih deuh reng avangin, season dang angin a khel thei lo a, mahse, khelmuala a awm chhunah erawh a theihna hmuh hmaih theih a ni lo.

James chuan, "Hun harsa tak a tawng a, season dang aiin a tan chuan a harsa ve bawk a ni. Mahse, Napoli laka minute 45 lek a khelh pawh khan a theihna sanzia a pholang.

"Kan zavai hian a chungah kan dawhtheih a ngai. Player ṭha tak a ni a, hma a sawn zel ang," a ti a, ram leh club tana a khelhpui player chu a chhan hle.

Chelsea hian zanin dar 11:00-ah league match khelh tur an nei a, West Ham an mikhual dawn - Thawhlehni zanah League Cup semifinal second leg Arsenal nen an khel zui dawn a, player ṭhenkhat an hahdam a nih pawhin a mak lo ang.

Blues hi coach thar Liam Rosenior hoin hma an sawn a, kum 41 mi coach enkawlna hnuaiah match ruk khel tawhin, vawi nga hnehna an chang.