A chung ber chu Arsenal lenna

Premier League hmahruaitu Arsenal-in tawlhthluk nawn an tum tawh lo - league match thum zet a zawna an chak zawh tawh loh hnuah hnehna hlado an chham ve leh ta a, Inrinni zan khan an mikhualna ramah Leeds United chu 4-0 in an sawp.

Gunners hian Thawhlehni zanah League Cup semifinal second leg an khel dawn a, hei vang hian Mikel Arteta tan fimkhur tel a ngai - captain Martin Odegaard pawh bench lama hun hmang zingah a tel.

Mahse, player inlan tam zawk chu first XI ṭhang an ni a, hetihrual hian Bukayo Saka chu warm up laia a inhliam avangin bul ṭan vek tura tih ni tawh mah se, bul a ṭan leh thei lo a, a aiah Noni Madueke a lut.

Gunners tan vanduaina hi malsawmnaah a chang zui. Madueke hian minute 27-naah ṭha zetin ball a thlawh lut a, Martín Zubimendi tan duhthusama tauh luh remchang a ni - a goal.

Minute 38-na a ni a, Madueke bawk kan hmu nawn. English forward corner pet hi Leeds keeper Karl Darlow chuan an lamah a dang pial lut a, 2-0 a nih zui avangin chak tur a chiang tawh tiin a sawi theih.

Gunners an phur laklawh. Minute 69-naah goal a khung theih loh vanga sawisel hlawh Viktor Gyokeres chuan Gabriel Martinelli siamsak chu tlu chungin goal-ah a khung a, match hnih a zawnin goal a khung ve leh ta.

Hun tawp nan minute li chiah a awm tawh tihah Arsenal bawkin goal an khung zui - Gyokeres thlak tura luhtir Gabriel Jesus-a'n a thiam a la theihnghilh lo tih pholangin, mawi zeta a inher hnuah an goal lina a khung.

Arsenal-in 4-0 in hnehna an chang a, player inhliamte an dam chho leh ta bawk nen, Mikel Arteta a phur khawp ang! Gunners hian point sarihin EPL-ah hma an hruai fal ta a, nizana Manchester City result a zirin, table erawh la danglam leh thei a ni.