Sub siam thiam Rosenior hote a chak

Stamford Bridge-ah Chelsea-in West Ham United an mikhual a, first half-ah 2-0 in an hnufual. Blues manager Liam Rosenior-a'n second half-ah substitution awmze nei a siam a, hun tawpah 3-2 in an chak. London club hian point 40 hmuin palinaah an invawrh chho a, nizana Manchester United leh Fulham inkhel result a zirin an dinhmun a danglam thei ang.

Inrinni zan inkhelah hian Hammers tan Jarrod Bowen leh Cysencio Summerville ten an khung a, Blues-in substitute pahnih João Pedro leh Marc Cucurella te hmanga si phurh an sut hnuah injury time-ah Enzo Fernández-a'n chakna goal a khung.

Tinkerman 'thar'

Claudio Ranieri-a'n kum 2000-04 chhunga Chelsea a enkawl khan starting eleven a thlak nasat avangin 'Tinkerman' hminglem an pe. Rosenior pawh hian player a siksawk nasat avangin 'Modern day Tinkerman' hminglem petu an awm ṭan.

Blues hian kar laihawlah Napoli an hneh a, player sarih ngawt a thlak. Bul ṭantu zingah Jorrel Hato, Benoit Badiashile, Trevoh Chalobah, Cole Palmer, Jamie Gittens, Alejandro Garnacho leh Liam Delap ten bul ṭanin Marc Cucurella, Wesley Fofana, Reece James, Andrey Santos, Estevao, Neto leh Joao Pedro te bench-ah an awm thung.

An lawm lo

Antonio Conte hote Napoli an hneh avangin Chelsea ṭantute an lawm a, West Ham laka first half an khelh danah erawh an lawm lo. Minute sarihna lekah Bowen-a cross chu khawihtu awm loin goal-ah a lut tlang.

Hammers an khel ṭha a, goal an khung bakah chance pawh an insiamṭha. An phu angin minute 36-naah Summerville-a'n goal hnihna a khung a, halftime-ah 2-0 a ni.

Chelsea ṭantuten an player-te an au el a, player-te nen pawh an inchhang hial. Goalkeeper Sanchez chuan anmahni ṭantute hnenah, "Minute 45 chauh kan la khel a, inkhel a la zo lo," tiin second half-a an insiamṭhat tur thu a sawi.

Comeback ropui

Liam Rosenior-a'n second half ṭan chiahah Fofana, Cucurella leh Joao Pedro te a luhtir nghal a, Hammers-in chance nei hmasa zawk mah se Blues substition-in awmzia a rawn nei. Minute 57-naah Fofana-a'n ṭha taka a lakluh hnuah a cross tawih zet chu Joao Pedro-a'n a tauh lut.

Chelsea ṭantute tan auna tur a rawn awm ṭan a, Moises Caicedo ball pet kawh ṭha tak pawh goal-ah a lut teuh hle. Blues-in minute 70-naah si phurh an sut zo a, Gusto ball tauh chu goal-ah lut nghal lo mah se crossbar a per hnuah dive chungin Cucurella-a'n a rawn tauh goal.

Goalkeeper Sanchez-a'n a hna a tlin a, second half-ah save ṭha bik ṭum hnih ngawt a nei. Inkhel a nung ṭha a, Cole Palmer vanneih zan ni lo mah se Enzo a rawn inlar. Injury time-ah Joao Pedro pass chu Argentine midfielder Enzo hian a khung.

A tawpah buaina

Chak tawh tura inngai West Ham-in nun phung an hloh a, Adama Traore-a'n ball tihper saktu Cucurella chu a kutin a theh phar dawrh. Goal leh assist neitu Joao Pedro-a'n Adama Traore hi a rawn nawr sawn a, boruak a sang nghal hle.

Player an innam nuai luai luai a, hetiang karah hian Jean-Clair Todibo-a'n Joao Pedro a rek bet. VAR hmanga thil thlen dan en hnuah referee-in Hammers player Todibo hi a hnawt chhuak a, Joao Pedro leh Adama Traore ten yellow card an hmu bawk.

Engtin zel?

Chelsea manager Rosenior chuan, "Football mawina kan hmu. First half-ah West Ham an chungnung a, second-ah kan chungnung zawk. A tirah khan kan khel a nung lo a, kan khelh dan a dik lo a, West Ham khan 2-0 a hmahruai kha an phu.

"Halftime-ah ka duh angte ka sawi a, ka beisei angte ka player-ten min hmuhtir. Khatah khan tactic lam a ni tawh lo a, rilru lam a ni tawh. Fan-te pawhin player-te an thlawp ṭha," tiin a sawi.

Blues hian February 3, Thawhlehni zan dar 1:30 hian Emirates Stadium-ah Arsenal an hmachhawn dawn. Rosenior hote hi League Cup semifinal first leg-ah 3-2 a an chak tawh loh avangin final khelh an tum a nih chuan second leg-ah an ṭhat dan bera an khelh nghal a ṭul ang.