ADFA buatsaih Inter Village Football

Aizawl District Football Association chuan Aizawl District huam chhunga VC/LC tan April 2026 hian 'LESDE Inter Village/Local Council Football Tournament 2026' a buatsaih dawn.

Aizawl District chhunga VC/LC khat aṭangin team khat zel chhuah theih a ni ang a, Aizawl District chhunga veng/khua tel lo aṭangin player pathum lak theih (re-inforce) a ni ang. Player pathum aṭang hian playing XI ah player pahnih chhawr theih an ni ang.

Player chu mahni vote thlakna khua/vengah ngeiah khelh tur a ni. Player lak (re-inforce) te chuan Voters ID an nei ngei ngei tur a ni. Aizawl District chhunga mi chauh Re-inforce phal a ni.

Voters ID endikna atan hian Kum 2025 VC/LC Electoral Roll hman a ni dawn. Kum la tling lo (Voter ID la nei pha lo) te chu Digital Birth Certicate hmangin an kum endik a ni ang a, an awmna khua/veng tichiang turin Ration Card en a ni bawk ang. Heng Document pahnih aṭanga pawm theihte chauhin an khel thei ang.

Team khatah player 20 (re inforce telin) leh team official panga ziah luh theih a ni ang. Entry fee hi team khat tan Rs 2,000 a ni ang a, match ball-ah Nivia Dominator hman a ni dawn.

Tun ṭum inelnaah hian ticket share system hman a ni dawn a, first round aṭangin, team-te leh organiser lamin ticket aṭanga sum hmuh an insem ang. Semifinal leh final-ah erawh lawmman team tan ruahman a nih avangin organiser lamin an chang thung ang.