Barcelona tan Yamal, Torres leh Rashford

Inrinni zan Spanish La Liga inkhelah table hmahruaitu Barcelona chuan Lamine Yamal, Ferran Torres leh Marcus Rashford te goal hmangin Elche 3-1 in an hneh a, Elche tan Alvaro Rodriguez-a goal khungin awmzia a nei pha lo.

Manuel Martinez Valero, Elx-a inkhelah mikhual team Barca tan minute rukna lekah Lamine Yamal-a'n Dani Olmo ball pek ṭha tak um lutin, Elche keeper Inaki Pena a bum hnuah an hmahruaina goal a khung a, Yamal-a tan tun season LaLiga-ah goal kua a khungna chiah a ni.

Minute 30-naah Elche tan Alvaro Rodriguez-a'n keeper chauh a hmachhawn hnuah cool takin a pet goal a, an si phurh a sutin mualneitu Elche ṭantute thawm a ring hle.

Elche phur hman viau mah se Barca bawkin goal an khung leh a, minute 40-naah Frankie De Jong-a'n Elche tlarhnung a bum hnuah Ferran Torres tan a pe leh a, Torres-a'n chiang taka pet goal-in a team hma a hruaipui nawn. Spanish forward Torres hian hun pek belhah a goal shot chu Elche defender Víctor Chust-a'n a lo pet chhuak hman.

Second half-ah Barca bawk an chungung a, Catalan club tan Olmo leh Ferran Torres-te an nung ṭha a, goal erawh an khung belh thei lo. Minute 72-naah Marcus Rashford-an chiang takin league-a a goal 10-na leh an chak nemnghehna goal a khung a, mualneitu Elche an thochhuak tawh lo a, hun a tawp zui.

Barca-in point 55 hmuin hmahruaitu an nih chhunzawm zel a, Barca hian nilaini khan Copenhagen hnehin direct-a last 16 lut zingah an tel a, Hansi Flick-a nuate hi an phur vanglai tak a ni. Barca hi an hmelma Real Madrid nen an inum zel a, point liin an inthlau mek. Nizana Real Madrid-in Rayo Vallecano an mikhual a, result kan hre hman lo.