Chak mah se Napoli lawm a kim lo

Inrinni zan Serie A inkhelah Napoli chuan 2-1 in Fiorentina an hneh a, Antonio Conte naute hi chak mah se an captain Giovanni Di Lorenzo a inhliam avangin an lawm a kim lo. Napoli tan Antonio Vergara leh Miguel Gutiérrez ten goal an khung.

Diego Armando Maradona Stadium-a inkhelah mualneitu Napoli an hlauhawm zawk a, minute 11-na lekah Napoli tan Antonio Vergara-a'n keeper Alex Meret ball pet chhuah um lutin cool takin a pet goal a, Napoli-in hma an hruai. Minute 49-naah Miguel Guttierrez-a'n an hmahruaina a belhchhah ve leh a, Fiorentina tan Manor Solomon-a goal khung chu scoresheet chei mawitu mai a ni.

Napoli chak mah se an lawm a kim lo a, minute 30-naah defender Di Lorenzo chuan ball kang a chuhna lamah a ṭum sual a, a khupah hliam a tuar. Di Lorenzo hi zawnchhuah a nih hnuah ambulance-in hospital-ah panpui a ni. Di Lorenzo hliam hi doctor-ten eng tiang chiaha na nge a nih an endik dawn a, thuchhuah la awm lo mah se ACL a nih a rinawm.

Tun hnaiah inhliam avangin Napoli an buai a, an result nghawngin Champions League aṭangin pet chhuah an ni a, Serie A-ah pawh an match hnuhnung pangaah vawi hnih chiah an chak. Napoli tan Vanja Milinkovic-Savic, David Neres, Amir Rrahmani, Matteo Politano, Andre Frank Zambo Anguissa, Kevin De Bruyne leh Billy Gilmour te chu hliam vangin an inkhel thei lo mek a, Di Lorenzo inhliam hi an tan channa nasa tak a tling.