Hma kan sawn zel chhung chu ka cham ang - Kane

Harry Kane chuan Tottenham-in hma a sawna, a hma lamah thil tum fel tak an nei a nih chhung chu North London club chhuahsan tumna a neih loh thu a sawi chhuak.

England striker hian kar hmasa mai khan Spurs player zinga hlawh tam ber ni turin kum 2022 thleng daih contract a ziak a, a contract hi a hmang zo a nih chuan kum 29-a upa a ni tawh ang.

Kum 23-a upa Kane chuan, "Ka ngaihdan chuan, Spurs hian hma a sawn zel a, thil tum leh thlen chin tur mumal taka nei a nih chhung chu he club tana khelh hi ka duh," tiin a sawi.

Kerek na vangin Kane hi season tir lamah a hmel kan hmu tam lo a, a dam hnuah erawh striker hriam berte zinga mi a ni leh der tawh. Kartawp Premier League inkhelah Swansea lakah goal hnih khungin tun season-ah goal sarih a khung leh tawh.

Kane chuan, "Hliam ka neih chhung khan a rang thei ang bera ka lo kir leh theih nan ka thawkrim a, ka dam veleh a rah a lang chhuak nghal. Inkhela goal khung hi nuam ka tih leh duhthusam a ni a, tuna ka khelh ang hian season tawp thleng ka khelh chhunzawm theih ka beisei," tiin khelh ṭhat chhunzawm zel a duh thu a sawi.

Tottenham hi Premier League-ah pangana an ni mek a, Champions League aṭangin an tla chiang tawh. Nilaini zan hian an group match hnuhnung ber atan CSKA Moscow an lo mikhual ang.