Thunder tan Westbrook a ropui

NBA legend Michael Jordan chuan kum 1989 khan a zawnin match nga chhung triple-doubles a lo nei tawh. Jordan hnuah hian Russell Westbrook chu hetiang dinhmun thleng leh thei hmasa ber a ni.

Nimin zing NBA regular season inkhelah Oklahoma City chuan New Orleans Pelicans lakah 101-92 in hnehna an chang. Chesapeake Energy Arena-a inkhela player langsar ber chu Westbrook a ni - American star hian court chhungah minute 37 hun a hman chhungin point 28 a score bakah rebounds vawi 17 lain assists vawi 12 zet a nei bawk.

Kum 28-a upa Westbrook hian tun season-ah vawi 10 ngawt triple-doubles a nei tawh a, tun ṭum hi a zawna vawi nga a neihna chiah niin Michael Jordan-a record a nih rual.

Westbrook hian a inkhelh hun chhungin triple-doubles vawi 47 nei tawhin NBA chanchinah nei hnem parukna a ni der tawh. A chungah hian Larry Bird (59), Wilt Chamberlain (78), Jason Kidd (107), Magic Johnson (138) leh Oscar Robertson (181) te an awm mek.

Thunder hian regular season kal mekah vawi 13 hnehna an channa chiah a ni a, vawi riat an chak lo tawh thung. Tukin dar 6 hian Atlanta Hawks nen an inkhel zui leh.

New York-a inkhel dangah Der-rick Rose leh Carmelo Anthony te chuan point 20 ve ve score-in Knicks chu Sacra-mento Kings lakah 106-98 in hnehna an chanpui. Rose hian tun hnai an match hnuhnung paliah vawi thum zet point 20 a score tling ta.