MPL5 Award Nominees Chanmari leh Chanmari West-in 5 ve ve an thawh
Mizoram Premier League Season 5-a mimal lawmman dawng thei tur nominees chu nimin khan MPL Board-in a tar chhuak a, chawimawina dawng thei tur hi MPL final zan December 16, Zir-tawpniah puan a ni ang.
Chanmari FC leh Chan-mari West FC ten player panga ve ve an thawh a, league hma-hruai-tu Bethlehem Veng-thlang FC player pali hming langin champion lai Aizawl FC aṭangin player pahnih chauh thlan an ni.
Semifinal lut pha lo zingah relegation playoff khel tur Ramhlun North-in player pahnih an thawh a, Chhinga Veng leh Dinthar FC aṭangin player pakhat ve ve thlan niin Zo United-in player an thawh ve lo.
Position tina ṭha ber thlan chhuah a nih bak-ah best player thlan a ni dawn a, goal khung tam ber hnenah top scorer chawimawina pek a ni ang.
Season liam ta khan Aizawl FC forward F. Lal-rinpuia chuan top scorer, best player leh best forward chawimawina a dawng a, mimala lawmman pathum dawng thei hmasa ber a ni.
Best goalkeeper thar awm dawn
MPL season li neih tawhah Lalawmpuia'n best keeper chawimawina a dawng vek a, tun season-ah erawh Aizawl Venglai tlangval AwP-a hi inhliam vangin minute 32 chiah a inlan a, nominee-ah telh a ni lo. MPL5-ah best goalkeeper thar an awm dawn.
Nominee-te chu
Lalruatpuia, Chanmari West
Chanmari West-in goalkee-per pahnih an chhawr tawh a, Lalruatpuia (Mama) hian match 15 an khelh tawhah vawi 12 inkhel bul ṭanin vawi khat dang erawh bench aṭangin a lut. College Veng tlangval hian vawi nga clean sheet (goal chhuah loh) a nei a, Champhaia Aizawl FC an hneh ṭumin man of the match-ah thlan a ni. Mama hian goal 14 a chhuah a, minute 81 dana goal khat zel chhuah ang a ni.
Liansangpuia, Ramhlun North
Ramhlun North keeper Liansangpuia hian match 9-ah inkhel bul a ṭan a, Aizawl FC an hneh ṭumin goal-a chhuah lo a, hemi
ṭum hian man of the match-ah thlan a ni bawk. Dâmpui tlangval hian goal 13 a chhuah a, minute 62 danah goal khat zel chhuah ang a ni.
Malsawmdawngzela, Bethlehem Vengthlang
Bethlehem VT keeper Malsawmdawngzela hi match 14-ah a inlan a, Round 14-ah an awltir tih loh chu a inlan vek. Khawzawl tlangval Mala hian goal 11 chhuahin minute 115 danah goal a chhuah a, BVT keeper hian game riat ngawt goal a chhuah lo a, MPL5 goalkeeper zingah clean sheet a ngah ber a ni.
MS Dawngliana, Chanmari FC
Chanmari keeper MS Dawngliana hi Round 10 thlengin rinrawl a ni a, hemi chhung hian match kua inlanin clean sheet vawi hnih a nei hman. Chanmari tlangval MS-a hian goal riat chhuahin minute 101 danah goal a chhuah.
Zothanmawia, Aizawl FC
Aizawl FC keeper Zothan-mawia hi league round hnu-hnung berah awltir ni mah se minute 32-na lekah Lalawmpuia a inhliam avangin a inlan leh tho. College Veng tlangval hi MPL5 bika keeper zinga match tina inlan thei awm chhun a nih bakah man of the match ṭum hnih dawng thei awm chhun a la ni bawk. Vawi nga clean sheet a nei a, minute 94 danah goal a chhuah.
Best midfielder-ah mi thar
MPL5 best defender nominee-ah midfielder langsar Rohmingthanga, R. Malsawmtluanga leh Reuben Zosangpuia te hming a lang lo a, player panga chhawpchhuah te hian chawimawina an la dawn loh bakah midfielder nominee-a an vawi khat telna a ni. A tawi zawng chuan MPL-ah best midfielder thar an awm dawn.
K. Lalnunzama, Chanmari West
Chanmari West midfielder K. Lalnun-zama (Valtea) hi man of the match-ah vawi khat thlan a ni tawh. Tun season-a Valtea inlan loh awm chhun chu Zo United laka goal thum an chhuah ṭum a ni a, 3-3 in an tawp. Inkhel pawimawha Chhinga Veng an hneh ṭum leh semifinal first leg-a BVT an draw ṭum-in Zawlsei tlangval hi a khel
ṭha takzet a ni.
Lalrinchhana, Chanmari FC
Chanmari midfielder Lalrinchhana'n semifinal-a Aizawl FC an sawp ṭumin goal khat a khung a, man of the match-ah thlan a ni bawk. Electric Veng tlangval Rinchhana hi league round-a AFC 1-0 a an hneh ṭumin man of the match-ah thlan a ni bawk. BVT midfielder hlui Rinchhana hian MPL5-ah goal khat chauh la khung mah se assist vawi thum a nei a, Chanmari FC midfielder zinga khel hnem ber a ni a, an rinrawl a ni.
Lalruatfela Zote, Chanmari FC
Republic Vengthlang tlangval Lalruat-fela Zote hian MPL5-ah goal thum a khung a, amah hi midfielder a nih rualin forward ang pawha chhawr theih a ni. Fela Zote hian tun season match riatah inkhel bul a ṭan a, chhungkaw lam har-satna vangin league round tawp lam match hnih khel lo mah se semifinal-a inkhel bul a ṭan leh meuh chuan Chanmari thahrui pawimawh a ni tih a pholang nawn.
Zosangkima, Bethlehem VT
Pangzawl tlangval Zosangkima hi semifinal-ah a inlan lo a, amaherawhchu league round-a a khelh dan thlirin BVT hmahruai theihna chhan pakhat a ni. Royal Wahingdoh midfielder hlui Sangkima hian thahrui a ngah bakah inkhel kalhmang a hriat avangin game pawh muan hun a hria a, BVT midfield khaipa a ni.
Zosangliana, Ramhlun North
Ramhlun North midfielder Zosang-liana'n MPL5-ah goal thum a khung a, I Day Football best player hian MPL kaithar hi relegation playoff pumpelh pui thei lo mah se tun season-a midfielder hmuhnawm ber zinga mi a ni. Armed Veng South tlangval hi man of the match-ah vawi khat thlan a ni a, inhliam vanga match hnih a inlan lo tih loh chu a inlan vek bawk.
Foreigner awm chhun Emma
MPL mimal chawimawina dawng thei tura player 20 zinga foreigner hming lang awm chhun chu Emma Chigozie a ni a, Nigerian player hi best defender dawng thei tur zingah a hming chhawp chhuah a ni.
Nominee-te chu
Emma Chigozie, Chhinga Veng
Nigerian defender Emma Chigozie hi Champhai-ah Chhinga Veng tan a inlan ṭan a, match riatah inlanin a khel tluan vek. MPL3-a AFC-a khel chunga best defender chawimawina dawngtu Emma hi ṭum thum lai man of the match-ah thlan niin MPL kai thar Chhinga Vengin pangana an nih theihna kawngah player pawimawh ber a ni hial ang?.
H. Lalhlimpuia, Bethlehem Vengthlang
Lunglei tlangval H. Lalhlimpuia hi Bethlehem VT match 15 khelh tawhah inlan kim vekin a khel tluan vek a,
ṭum hnih man of the match-ah thlan a ni. Lalbiaksanga Colney hoten table hmahruaitu an nihna kawngah ani aia pawimawh an awm chuang lo. Round 2-a Chanmari West an lehthal ṭumin Lalhlima hian goal hnih a khung.
Lalramchullova, Aizawl FC
Chanmari FC-in semifinal first leg-ah Aizawl FC 4-1 in an sawp a, Lalramchullova tel loin I League club tlarhnung a pawp tih a chiang a ni. Armed Veng tlangval Chullova hi man of the match-ah vawi hnih thlan a ni tawh a, MPL3 best player hian goal thum a khung bawk.
Lalrinchhana Tochhawng, Chanmari FC
Lalrinchhana Tochhawng hi sea-son liam ta khan best defender-a thlan a ni tawh a, tun season-ah Chanmari FC bang rinawm a ni leh bawk. Mamit tlangval Rinchhana hi Chanmari match zawng zawngah a inlan a, round hnuhnung bera Aizawl FC an hmachhawn ṭumin awltir ni mah se chak lo zawkah an ṭan avangin luhtir a ni leh tho.
Vanlalzuia Hnamte, Chanmari West
Chanmari West defender Vanlalzuia Hnamte hi defender nominee zinga wing back lang awm chhun a ni. Lungchhuan tlangval Zuia hi semifinal first leg-a BVT nen an inhnehtawk
ṭumin man of the match-ah thlan a ni a, Round 2-ah BVT an hneh loh ṭumin inhliam vangin squad-ah awm lo mah se a bak match 14-ah a khel tluan vek. West Warrior defender hi MPL Awards nominee-a a awm vawi khatna a ni.
MPL5 Award Nominees te chu
Best Goalkeeper
1 Lalruatpuia Chanmari West
2 Liansangpuia Ramhlun North
3 Malsawmdawngzela Bethlehem VT
4 MS Dawngliana Chanmari FC
5 Zothanmawia Aizawl FC
Best Defender
1 Emma Chigozie Chhinga Veng
2 H. Lalhlimpuia Bethlehem VT
3 Lalramchullova Aizawl FC
4 Lalrinchhana Tochhawng Chanmari FC
5 Vanlalzuia Hnamte Chanmari West
Best Midfielder
1 K. Lalnunzama Chanmari West
2 Lalrinchhana Chanmari FC
3 Lalruatfela Zote Chanmari FC
4 Zosangkima Bethlehem VT
5 Zosangliana Ramhlun North
Best Forward
1 Laldampuia Chanmari West
2 Lalrammuanpuia (Apuia) Bethlehem VT
3 Malsawmfela Chanmari FC
4 Michael Lalremruata Dinthar FC
5 R. Laldanmawia Chanmari West